Ramón d'Andrés presenta la so renuncia como responsable de la Oficina de Política Llingüística

Nuna carta remitida a la nueva Conseyera de Cultura con data del 3 d'agostu, Ramón d'Andrés, hasta agora xefe de la Oficina de Política Llingüística del gobiernu asturianu, da anuncia de la so renuncia al cargu. Nesta carta Ramón d'Andrés conseña que "acabada definitivamente la llexislatura, ye claro que terminó tamién la misión que se m'encargó, entamando agora una etapa nueva, dientro un marcu políticu diferente" polo qu'entiende que "nun procede continuar nel puestu, y por ello presénto-y la mio renuncia como xefe de la Oficina de Política Llingüística". Fai amás un balance "satisfactoriu" de l'actuación de la Oficina durante la pasada llexislatura.

D'Andrés señala que "acepté con ilusión el cargu, y nestos años trabayé, xunto con un equipu mui cualificáu, en diverses facetes de la normalización llingüística de la llingua asturiana y el gallego-asturianu" y "a pesar de les circunstancies dacuando difíciles, el balance pue considerase -en llinies xenerales- satisfactoriu, algamándose oxetivos novedosos qu'asienten precedentes pal futuru y que nos consta que merecen l'aprobación de munchos sectores sociales involucraos na defensa de la llingua asturiana, y tamién de responsables nel ámbitu autonómicu, municipal y cultural". Asimesmo califica'l nomamientu de Consuelo Vega como Directora Xeneral de Política Llíngüística como "un aciertu y una garantía de que la política llingüística va tar en bones manes".