Ramón d'Andrés reconoz qu'hai un retrasu n'aprobación d'espedientes toponímicos

L'aprobación definitiva en Conseyu de Gobiernu de los espedientes colos topónimos de los conceyos de Nava y Ayer ta retrasándose más p'allá de lo que contaben les partes implicaes en procesu de recuperación toponímica. El director de Política Llingüística Ramón d'Andrés reconociólo asina a Asturies.com, afirmando que "ye evidente que los decretos de Nava y Ayer tan sufriendo un retrasu que nos tien preocupaos" anque nun quixo afondar nes posibles causes d'esti retrasu nin facer más declaraciones al respective, ello dempués de que la sesión de Conseyu de Gobiernu d'esti miércoles 22 de marzu nun resolviere los espedientes de Nava y Ayer, que lleven yá dende primeros de xineru esperando'l so pase per Conseyu de Gobiernu.

Ello ye que dambos espedientes lleven yá dende primeros de xineru esperando'l so pase al orde del día del Conseyu de Gobiernu, pero a fecha de güei siguen aprobase, siendo que en tolo que se lleva d'esti añu 2006 entovía nun s'aprobó espediente toponímicu nengún pol gobiernu asturianu. Ello cuando dende'l Conceyu d'Ayer, ún de los que tan en primer llugar de la "llista d'espera" yá contaba con ello va quince díes y incluso llegó a entamar la señalización de les sos parroquies y llugares con carteles y rótulos nos que figuren nomes qu'entovía nun son oficiales.