Rafael Palacios denuncia que la FSA cree qu'Asturies ye la so corripa particular

El representante del Bloque por Asturies, Rafael Palacios, comparó ayeri al portavoz del Grupu Socialista na Xunta'l Principáu, Fernando Lastra, colos 'afrikaners', el movimientu d'ultraderecha que defendía'l sistema del 'apartheid' na República Surafricana, por descartar cualquier posibilidá de que se reconoza la oficialidá de la 'llingua' na próxima reforma del Estatutu d'Autonomía.

"El portavoz del PSOE na Xunta, nuna actitú digna del meyor de los 'afrikaner' qu'impunxeron el 'apartheid' en Sudáfrica, amenazadora, antidemocrática, intolerante y irresponsable, avísamos de que por muncha movilización que mos empeñemos en facer la 'llingua' nun va ser oficial", afirmó Palacios nuna rueda de prensa.

"Va ser verdá que van acabar creyéndose los dueños d'esti país, y qu'Asturies ye'l so corripiu particular", señaló, lleyendo un counicáu nel que denunció públicamente "l'odiu irracional" qu'al so xuiciu los dirixentes socialistes tienen a la llingua asturiana.

Dende'l so puntu de vista, en virtú de l'actual política del Gobiernu de Vicente Álvarez Areces, "la llingua ocupa un llugar testimonial nos medios públicos, un espaciu marxinal na educación, nun tien nenguna validez alministrativa y, amás, tán faciéndose desapaecer los nomes tradicionales de los nuesos pueblos".

Nesti sen, Palacios remarcó la postura de la formación de la que ye voceru, favorable a la inclusión de la oficialidá nel nuevu Estatutu d'Autonomía, porque "ensin ello nun hai garantíes reales de supervivencia de la llingua".

El dirixente de la formación d'izquierdes mostró la so indignación pola "contradicción" qu'entiende que se da a nivel llingüísticu, ente Asturies y les comunidaes autónomes que sí tienen una llingua oficial a parte del castellán. Pidió, poro, qu'espliquen esta cuestión. "Tovía nun vimos a nengún dirixente de los que s'oponen a la oficialidá esplicando esta contradicción", llamentó Palacios.

"Ye necesario", señaló, "que'l nuesu Estatutu reconoza los mesmos derechos llingüísticos que se reconocen a otros ciudadanos". "¿Por qué los vascos, los gallegos, los catalanes, los habitantes del Valle d'Arán tienen más derechos que nós; por qué lo que val pa ellos, pa nós nun val?", entrugó'l líder del Bloque.