Radio Sele y Riopedre, premios “Andrés Solar”

Los premios Andrés Solar lleguen a una edición especial enforma, y ye qu'estos galardones que vien entregando la Xunta pola Defensa de la Llingua Asturiana los últimos dieciocho años col nome del desapaecíu escritor xixonés, Andrés Solar Santurio, conmemoren el 20 cabudañu de la muerte del autor de Deva. Pa ello, la Xunta pola Defensa de la Llingua Asturiana va celebrar un actu d'entrega que se tresllada de fecha hasta'l 28 de Xineru y pal que se cuenta con enllenar el Teatru Xovellanos de Xixón. Pa ello tan previstes les actuaciones musicales de Xulio Ramos y Nuberu nun actu d'especial solemnidá n'alcordanza del escritor y fundador de la Xunta Pola Defensa de la Llingua que tamién va tener otros atractivos como la proyección del documental "Andrés Solar, una voz del Surdimientu" obra de Javier Lueje y Pelayo Duarte.

La hermana d'Andrés Solar, Lali Solar, va entregar un añu más el premiu positivu o "pegollu" a la persona o institución que más ficiere al favor de la llingua asturiana, reconocimientu que va nesti añu 2004 pa la emisora de radio uvieina Radio Sele. L'acta del Xuráu destaca que Radio Sele "ye un exemplu de constancia ye que lleva funcionando dende febreru de 1986 como única emisora de Radio qu'emite les 24 hores del día en llingua asturiana". L'episodiu de la retirada de llicencia comercial que tenía concedida la radio en 1999, entovía pendiente de xuiciu, tamién se reconoz nel acta del xuráu, que premia'l llabor de normalización que fai la emisora radiando, dende les dos últimes temporaes, tolos partíos del Real Uviéu n'asturianu.

Pela so parte'l premiu negativu o "madreñazu" va nesta edición 2004 pal Conseyeru d'Educación del Principáu, José Luis Iglesias Riopedre. El xuráu xustifica la concesión del premiu a Riopedre en cuantes que "La situación de la llingua asturiana nel añu 2004 tuvo abondes carencies pero la situación específica de la educación llevó a la Xunta Moza, estaya de mocedá de la Xunta pola Defensa de la Llingua Asturiana, a convocar una fuelga d'enseñanza media, una midida ensin precedentes pero que se consideró necesaria énte la constatación de que la enseñanza del asturianu n'Asturies nun cumplía siquiera los probetayos mínimos qu'establez la llegalidá vixente". Según l'acta de los premios Riopedre ye "responsable por ello de que la escolarización de la nuesa llingua tea nunes condiciones míseres, como responsable de que nun se respete la llei y responsable de negar la evidencia d'esta situación, aneciando nel error y negando l'ésitu ensin precedentes d'una fuelga d'enseñanza que fixo historia na revindicación llingüística".