Rabanal alvierte d'una posible prórroga presupuestaria pal 2008

Dempués de que la diputada d'IX-BA-LV manifestare la voluntá de la so formación de nun entrar a negociar los presupuestos asturianos pal 2008 colos socialistes, el conseyeru d'Economía y Asuntos Europeos Jaime Rabanal declaróse ayeri dimpuestu, de dase'l casu, a prorrogar les cuentes del 2007, dalgo qu'esplicó que nun supondría mayor problema, anque diba llimitar delles inversiones nueves".

Los argumentos dende la parte d'IX-BA-LV son claros: la coalición, dempués de perdese la posibilidá de gobernar xunto colos socialistes, niégase a negociar unos presupuestos ensin tener la posibilidá de xestionalos y controlalos dende l'executivu. Como yá anunciare, la coalición d'izquierdes va dedicase a facer oposición, y Martín alvierte que nun van apurrir soluciones pa que gobierne'l PSOE, partíu al que criticó pola política d'ayudes al nacimientu de fíos, que calificó de "propia del PP".

El conseyeru Rabanal retrucó a la diputada alvirtiendo que, anque ye posible entrar nuna situación de prórroga presupuestaria, dende'l so departamentu trabáyase na ellaboración d'un documentu "que mereza'l preste d'IX" una formación que dixo que "yá aprobó bien de presupuestos que nun xestionó".