Río Narcea va esixí-y dineru al Gobiernu asturianu por refugar la mina de Salave

La empresa Río Narcea Gold Mines va reclamá-y al Gobiernu asturianu una indemnización de cerca de 100 millones d'euros pola negativa del executivu autonómicu a da-y el preste a la esplotación d'oru que la empresa canadiense contaba con abrir en Salave (Tapia) y qu'alcontró la refuga absoluta de los vecinos del llugar.

El presidente de Río Narcea Gold Mines, Alberto Lavandeira nun tien entovía la cifra esacta que pola que se va poner pleitu contra l'alministración asturiana y que va ser el resultáu d'amestar los gastos que se fixeron na fase previa a la esplotación más el llucru cesante de la mesma, pero adelantó nel trescursu d'una conferencia na Facultá de Mines una riestra de procesos contencioso-alministrativos contra la comunidá autónoma asturiana col oxetivu de que'l Gobiernu qu'encabeza Vicente Álvarez Areces entorne la so decisión y consienta col aniciu de los llabores nesta mina proyectada sobre la costa asturiana y qu'abriría un cráter de más de 600 metros de diámetru nun llugar de gran interés paisaxísticu y históricu pa sacar una producción peritada en cerca de 45 tonelaes de metal mariellu.