¿Quién ye Fernández Luiña, l'articulista lliberal a favor de la oficialidá?

L'asturianu llegó a ocupar la xefatura d'Estudios de la Fundación Disenso de VOX.

Eduardo Martínez Luiña protagonizó parte de la sesión de la Xunta Xeneral d'esta mañana. Foi'l presidente Adrián Barbón el que fixo referencia a él por un artículu espublizáu'l llunes "pol lliberal", dixo, nel diariu 'La Nueva España' entituláu 'La cooficialidad y la Asturies que puede ser' na que declara que la so llingua materna ye l'asturianu y se posiciona a favor de la oficialidá de la llingua asturiana y del gallego-asturiano, al que se refier como 'eo-naviego'.

Pero, ¿quién ye Martínez Luiña? Nel periódicu preséntase como politólogu, decanu en la Universidad de las Hespérides, profesor en la Universidad Francisco Marroquín y coordinador de Rellaciones Internacionales del Instituto Juan de Mariana.

Natural de Veiga (Navia) y emigrante, reconoz nel artículu que per munchu tiempu defendiera "na solombra, la cooficialidá de la llingua asturiana, la mio llingua materna". Doctoráu en Ciencia Política pola Universidade de Santiago, onde estudiara la carrera, especializóse en política iberoamericana y les sos espublizaciones xiren sobre la calidá democrática.

Collaborador per años cola Fundación FAES, venceyada al PP, nel so currículu rescampla tamién el so nivel d'idiomes, al contar con un C2 de gallegu y tamién nivel avanzáu n'inglés y italianu nes pruebes certificaes adaptaes al Marcu Común Européu de Referencia pa les Llingües. Ente les sos collaboraciones,

Apuesta de Martín Frías

La so trayeutoria llevó a Jorge Martín Frías a apostar por él como la so mano derecha al frente de la Fundación Disenso, llaboratoriu d'idees creáu por VOX nel 2020. Ocuparía hasta l'añu pasáu'l cargu de Xefe d'Estudios y Formación, anguaño en manes de Ricardo Ruiz de la Serna.

El so artículu a favor de la cooficialidá tuvo gran repercusión en redes sociales, hasta'l puntu de facese ecu d'él Barbón na Xunta Xeneral nes sos répliques a PP y VOX sobre l'asturianu, únicos partíos del Parllamentu que s'oponen a la oficialidá de les llingües propies d'Asturies. El diputáu del otru partíu de la derecha asturiana, Adrián Pumares de Foro, usa l'idioma de manera habitual nes sos intervenciones parllamentaries y posicionóse a favor de reconocimientu de la llingua asturiana y el gallego-asturiano como manda la Constitución.

Na semeya, Fernández Luiña na presentación l'añu pasáu en La Buena Letra de la so primer novela, 'La verdad se encuentra en el bosque' (Malas Artes Editorial), actu que conduxo Inaciu Galán. Semeya (recortada) propiedá de Galán.