La Querella Arxentina contra'l franquismu suma cuatro denuncies asturianes nueves

|

El consul d'Arxentina en Vigo recibió la selmana pasada en Xixón cuatro denuncies asturianes nueves que se sumen a la Querella Arxentina. Ésta investiga crímenes del franquismu.

Nel 2010, la xueza María Servini de Cubría abrió una investigación tres una denuncia de familiares de víctimes y solicitó al Estáu español información sobre los militares involucraos na dictadura y llistes d’asesinaos y desapaecíos, ente otros documentos. Dellos coleutivos recibieron con esperanza esta iniciativa de la xusticia arxentina al entender que, tres la Llei d’Amnistía del 1977, los crímenes franquistes quedaron impunes dafechu, creándose plataformes d’apoyu a la querella. Nel nuesu país, La Comuna d'Asturies, el grupu asturianu que forma parte de la Coordinadora estatal d’apoyu a la Querella Arxentina contra crímenes del franquismu (CeAQUA), vien recopilando casos asturianos socedíos na etapa que garra esta causa, ente’l golpe d’Estáu de Franco en 1936 y les primeres elecciones democrátiques en 1977, que desendolcaron en denuncies nel Consuláu d’Arxentina en Madrid y en Vigo.

Nesta ocasión, el cónsul Roberto Gudiño recibió dos casos sobre asesinaos y presos na posguerra –ún d’ellos protagonista del trístemente famosu 'trabayu esclavu' y asesináu en monte, onde taba fugáu–, otru sobre un represaliáu políticu nos años setenta y, finalmente, la denuncia del Atenéu Obreru de Xixón por robu y espoliu de los sos edificios, pinacoteca y biblioteca depués de la entrada de les tropes golpistes na ciudá n’ochobre de 1937. La Comuna d'Asturies espón equí estes denuncies de manera más concreta:

  • Luis Pascual, presidente del Atenéu Obreru de Xixón, por alcuerdu de la so xunta directiva, presenta una denuncia por robu y espoliu de los sos edificios, pinacoteca y bilioteca namás cayer la ciudá nes manes de les tropes franquistes. El so patrimoniu taba formáu por un edificiu na cai Ezcurdia de cuatro pisos, un solar al que se diba treslladar la sede central, otros dos locales n’El Llano y La Calzada, una biblioteca de más de 30.000 volúmenes y una pinacoteca con pintures, ente otros, de Solana, Valle, Piñole, Pardo, Vicente, Regoyos... Los cuadros y los muebles desapaecieron y la Falanxe quemó más de la metá de los llibros, anque los que sobrevivieron consérvense güei na biblioteca municipal Xovellanos. Tolos inmuebles foron requisaos poles autoridaes franquistes. El secretariu del Atenéu, Rufino García González, foi fusiláu y otros socios sufrieron prisión, como Argimiro Soberón Migoyo, José Ramón Argüelles, Maximino Riera Rodríguez, Caprasio Muñiz Valdés, Constantino Suárez (encarceláu dos veces y al que-y negaron el permisu de fotógrafu ambulante por pertenecer al Atenéu) y Emilio Robles Muñiz «Pachín de Melás» (muertu de tuberculosis na cárcel).
     
  • Boni Ortiz presenta denuncia por detenciones, nes que sufrió malos tratos y foi testigu de tortures a compañeros por parte de miembros de la Brigada Político-Social que cita nel so escritu. La primer detención foi en 1971, con 17 años, cuando tuvo presu 11 díes nes comisaríes de Xixón y Uviéu por actividaes de protesta como miembru de l’asociación cultural Gesto. Volvieron detenelu aquel añu con otros dos compañeros acusaos de terrorismu. Nel xuiciu condenáronlu a dos años y cuatro meses de prisión y una multa. Boni Ortiz salió de la cárcel en 1975, depués de pasar peles d’El Coto, Uviéu y Zaragoza. En 1976, mentes facía’l serviciu militar, detuviéronlu con otros compañeros pola so militancia na OIC (Organización de Izquierda Comunista). Cola amnistía pola coronación de Xuan Carlos I sobreseyóse la causa.  
     
  • Luis Álvarez Pascual, xornaleru residente en Riel.lu (Teberga), participó na defensa del Gobiernu republicanu lluchando nel so Exércitu. Cuando’l Frente Norte cayó, la Falanxe foi a buscalu a so casa y lleváronlu al Palaciu d’Entragu, centru de detención y tortura onde desapaeció. Una de les hermanes vio a un falanxista cola cazadora de Luis y cinco tumbes recién escavaes. Años depués, súpose qu’aquella nueche desapaecieren del palaciu Manuel Martínez Álvarez, Ceferino Lorenzo Arias y Ramón «el de la Calderera», toos d’Entragu, y Julio Lombardero, vecín de Riel.lu. Otru hermanu de Luis, Manuel Álvarez Pascual, tamién xornaleru y residente en Riel.lu, lluchó nel Exércitu de la República hasta la cayida del Frente Norte. Xulgáronlu por «auxiliu a la rebelión» y condenáronlu a 15 años. Deteníu, pasó pel palaciu de la Diputación, La Cadellada, la Cárcel Modelu d’Uviéu y la Tabacalera de Santander, d’onde salió en 1941 en llibertá condicional. En 1948 marchó clandestinamente d’España pa Venezuela. Nun volvió hasta 1977. María Isabel Alonso Álvarez denuncia estos casos con so madre, Trinidad Álvarez Pascual, de 86 años, hermana de Luis y Manuel.
     
  • Francisco Muñiz Rodríguez nació en Soto, Llorío (Llaviana), en 1913. Mineru y comunista, participó na revolución d’Ochobre y na Guerra Civil como milicianu. Al cayer el Frente Norte, echóse al monte, onde tuvo fugáu hasta xineru de 1940, cuando-y dispararon n’El Raigusu. Entregóse n’abril y condenáronlu a cadena perpetua. Pasó per delles prisiones y redimió penes trabayando nel destacamentu penal d’El Pozu Samuño. Nel añu 1943 soltáronlu, pero pola so implicación col PCE tuvo que volver echase al monte en 1946. La Guardia Civil asesinólu en Polio (Mieres) el 19 de mayu de 1947 con otros cuatro guerrilleros, Manuel Vizcaíno, Ovidio Llaneza, Constantino Rubio y Josepín González. Presenta la denuncia’l so nietu, Paco Ramos Muñiz.

Contador Estadistiques