Queden places pa participar nel "Acampallingua"

La Xunta Moza, estaya de mocedá de la Xunta Pola Defensa de la Llingua Asturiana, tien abiertu a lo llargo d'esta selmana, col 28 de xunetu de fecha tope, el plazu p'apuntase a “Acampallingua” un campamentu de branu con actividaes alredor de la llingua que la organización propón como una ufierta pa “llenar el vaciu qu’hai na ufierta d’actividaes d’ociu pa la mocedᔠy pal qu'entovía queden delles places llibres.

La primer edición de l’Acampallingua va facese ente los díes 7 y 12 d’agostu en Villaverde (Villaviciosa), y ta abierta a la participación de mozos y moces de 14 años en p’alantre, tando la organización del eventu y de toles actividaes complementaries, ente les que va haber rutes a caballu, travesíes en canoa, visites guiaes culturales, talleres de cocina, de radio y de xuegos tradicionales, al cargu de monitores titulaos n’actividaes de tiempu llibre. El coste de l’Acampallingua ye de 120€ por participante con descuentos en casu de dir dos o más hermanos y inclúi tolos gastos del campamentu, dende’l desplazamientu a la comida xunto col agospiu en tienda de campaña y demás actividaes.
Les inscripciones puen facese al traviés del teléfonu 660 36 13 99, na web de l'asociación o nel chigre que lleva la Xunta, La Casa Posafuelles, que s'asitia na Cai Cuesta La Vega d'Uviéu.