¿Qué pasa nel mar?

La marea prieto del Prestige dexose ver la selmana pasada, cuando se pañaron nun fin de selmana más de 5 tonelaes de galipote y más de 25 playes amanecieron entafarraes en negro. Mientres pasaba esto, la polémica afectaba a les cofradíes de pesca, que trancaben la costera del bocarte con unes captures probes que, al decir de los profesionales, nun dan nin pa cubrir el gastu. La rellación ente'l galipote del barcu malditu y la mengua de la pesca parez demasiao evidente, y les cofradíes pidieron compensaciones económiques pola mala campaña del bocarte, pero espertos nel mediu marítimu y ecoloxistes ven otres causes nel desaniciu del bocarte, y afirmen que nun ye cosa que venga del otru añu p'acá.

D'una parte, biólogos de la Universidá dixeron que nun ye tan fácil establecer una rellación causal ente galipote y pesca igual que suel facese con galipote y turismu en cuantes que
la
concentración de fuel n'agua de mar ye pequeña. Esta circunstancia vien a coincidir tamién con años de sobreesplotación de caladeros que tan yá afogaos, cola presencia de barcos d'arrastre y coles consecuencies del cambiu climáticu, que ta afectando a les poblaciones mundiales de pexe. Un estudiu que salió va poco na revista Nature afondaba nesti particular y reconocía que delles especies podíen tar nel 10% de los niveles de va 50 años. Nel casu particular del Cantábricu, l'institutu vascu AZTI, que ta faciendo'l seguimientu científicu de los efectos del prestige pal gobiernu euskaldún, yá alvirtió va tres años del riesgu de sobreesplotación nos caladeros de la costa cantábrica, reconociendo qu'especies como la sardina, el chicharru y la merluza yá taben nel añu 2.000 cola población fuera del mínimu biolóxicu

Con too y con ello, la campaña del bocarte va dexar pasu a la del Bonitu, especie que los espertos reconocen que pue dañase más pola presencia del galipote y qu'amás yá dio l'añu 2.002 una campaña bien probetaya de resultaos.