Puntu de dignidá pal Sporting

El Real Sporting de Xixón nun quier dase y tenta de siguir vivu nuna lliga na que los puestos d'honor siguen a muncha distancia pero na que l'equipu qu'entrena Marcelino García va ganando enteros cada selmana. Esti sábadu, nel campu del líder, el Sporting controló gran parte del partíu partíu y sacó un puntu que sabe a poco en viendo les ocasiones que tuvieron los xugadores asturianos pero que val muncho en términos de moral, en cuantes que pudo vese nel Ramón de Carranza a un equipu recuperáu nel que tolos sos xugadores tuvieron a l'altura de les circunstancies.

El partíu entamó con alternancia d'ocasiones pa dambos conxuntos. Jonathan Sesma tuvo la primer ocasión clara pal equipu mariellu, pero ellí tuvo un Roberto que ta cuayando como porteru, encargándose Samuel de retrucar con un frayu qu'atayó l'arrebatedor gaditanu Armando. El Cádiz garró entós el mandu del xuegu, col Sporting buscando la contra rápida, pero foi l'equipu local el que disfrutó de más ocasiones, obligando a trabayar a Roberto, anque la enteriza defensa del Sporting demostró un aguante mui superior al que tenía avezada a la so afición, collaborando muncho nello la vuelta de Christian Díaz. L'arxentinu foi'l pegollu más firme d'una trasera que tarazó los más de los intentos del Cádiz, pero llamentablemente a Sporting faltó-y rixu nel ataque, mostrándose poco operativu Pablo Álvarez, normalmente'l más peligrosu del Sporting pela banda derecha. Nel segundu tiempu'l control cambió de manes y foi'l Sporting, col tamién recuperáu Biagini, el que fizo más dañu nes llinies del Cádiz.

Con Biagini afuracando l'área gaditana, les oportunidaes más clares pal Sporting tuviéronles Juan y Calandria. El de Prevera quedó solu énte Armando, probando suerte con un frayu cruciáu que l'arrebatedor local echó fuera per un marxe de centímetros, mientres que'l tiru de Calandria tuvo menos peligru. El Cádiz namás respondió con un tiru de Paz que-y salió mui altu al xugador local. A la fin, repartu de puntos y el Sporting cola obligación de siguir ganando tolos partíos de casa, como'l que lu va enfrentar esta selmana al filial del Málaga