PSOE y PP defenden nel Congresu la oficialidá de les llingües del Estáu

El Partíu Popular y el PSOE presentaron en Congresu de los Diputaos dos proposiciones non de llei referentes a la cuestión llingüística nel estáu que se van debatir el próximu martes y nes que defenden la oficialidá de les llingües d'España. Esta postura contradiz la de dambes fuerces polítiques n'Asturies, onde les dos, sobremanera'l PSOE, atalanten que la oficialidá del asturianu diba ser una "imposición".

Según informaba ayeri'l diariu gallegu Vieiros, la propuesta socialista, presentada'l pasáu 9 d'avientu en Congresu de los Diputaos, argumenta que nes comunidaes en qu'hai llingües cooficiales "xeneróse una dinámica de convivencia llingüística" al empar que "nun se fixo de menos a la llingua común" y congráciase polo que de llogru democráticu tien "la pluralidá llingüística del estáu". Na proposición el PSOE pídese lliteralmente "impulsar, en collaboración coles Comunidaes Autónomes, iniciatives empobinaes a garantizar el respetu y la protección de les llingües españoles como elementu esencial del nuestru patrimoniu común" y "mirar porque se-yos garantice a los ciudadanos el derechu y la llibertá d'escoyer cualquiera de les llingües oficiales de la so comunidá" amás de "Potenciar y afitar un diálogu ente toes elles, sobremanera nos terrenos de la cultura y la educación".

Otramiente, la propuesta del PP, que se presentó tamién nel mes d'avientu, pide que "nun se discrimine nin persiga a nadie pola llingua qu'emplegue" y que'l conocimientu del castellanu nun se faiga de menos nel actual contestu d'espoxigue de les llingües de les comunidaes autónomes y critica l'actitú de la Generalitat de Cataluña nesti sen, a la qu'acusa de persiguir a ciudadanos y empreses por emplegar el castellanu.