PSOE y IX negocien un alcuerdu “esclusivamente” d’investidura

Les negociaciones ente’l PSOE y IX tres la celebración de les eleiciones tán siendo “esclusivamente” d’investidura. Ello significa que, de momento, la coalición refuga la posibilidá d’entrar nun posible Gobiernu socialista d’Asturies.
 
El secretariu xeneral de la FSA-PSOE y candidatu a la presidencia, Javier Fernández, y el coordinador xeneral d’IX d’Asturies y cabeza de llista de la coalición, Jesús Iglesias, mantuvieron güei la so segunda reunión dende’l 25-M. Nella, dambos alcordaron siguir intercambiando documentos nos díes próximos pa tornar a aconceyase’l xueves, a les 17 hores, na Xunta Xeneral. Pa esi día, les dos formaciones "yá analizaríen la documentación que van treslladase nes feches próximes y tomarán una decisión", indiquen dende IX.
 
Los conteníos políticos que s’estudiarán son la necesidá d’un alcuerdu de concertación social p’Asturies; el compromisu col estáu del bienestar; la defensa de la sanidá, la educación pública y les prestaciones sociales; asina como l’adopción de midíes de tresparencia nes alministraciones públiques, amás de la pluralidá na composición de los órganos de la Xunta Xeneral. D’igual forma, Fernández y Iglesias "van siguir esplorando les posibilidaes d’alcuerdos que vayan más allá de la investidura", yá sían puntuales, de llexislatura o de participación nel Gobierno, esplica la coalición.