PSOE y IX celebraron los sos órganos internos na viéspora del tercer alcuentru pal pautu de Gobiernu

La FSA-PSOE y izquierda Xunida d'Asturies celebraron ayeri, xusto enantes de vese por tercer vegada pa siguir negociando'l pautu de gobiernu pa la llexislatura 2007-2011, dambos cónclaves internos. D'esta miente, los socialistes fixeron el so "Comité Rexonal" órganu internu nel que'l Secretariu Xeneral de la FSA Javier Fernández pidió confianza na dirección política de la formación pa siguir les negociaciones.


Fernández esplicó n'acabando la reunión que la negociación con IX-BA-LV que la negociación "nun presenta diferencia nenguna respective a la de l'anterior llexislatura". Fernández nun quixo facer "nin valoraciones ni demasiao optimistes nin demasiao pesimistes" y centró'l desarrollu de la negociación en "buscar la complementariedá de los programes ensin desnaturalizar nengún".

L'organismu del PSOE valoró tamién de manera oficial los resultaos electorales del 27 de mayu, unos resultaos que se definieron como "mui positivos" en cuantes que se trata del tercer meyor resultáu de los socialistes na historia de les elecciones autonómiques, sacantes los 1983 y 1999.

Nun pudo facer una valoración tan positiva'l Conseyu Políticu d'IX, que tuvo llugar tamién ayeri y nel que la formación reconoció nel planu de los conceyos "unos resultaos desiguales con aspectos poco satisfactorios" mientres que na valoración de conxuntu la coalición valoró'l fechu de caltener la so tasa de representación política "nun contestu difícil". L'otru gran tema que centró'l Conseyu Políticu foi la crisis entamada na organización pol sector críticu, que nes pasaes elecciones decidió francer cola formación y presentar llistes propies baxo'l nome "ciudadanos pola izquierda". IX decidió ayeri borrar de los sos censos de militantes a tolos que sofitaren estes candidatures.