PSOE y IU valten les enmiendes de BA y PP contra la reforma de la función pública

El Plenu de la Xunta Xeneral refugó colos votos de PSOE y IU-Verdes dos enmiendes a la totalidá presentaes por BA y PP al proyectu de llei d'octavu cambiu de la Llei del Principáu d'Asturies d'Ordenación de la Función Pública.

El diputáu de Bloque por Asturies (BA) pidió'l refugu ante'l cambiu al entender que namás busca "llegalizar pela vía rápida'l sistema dedocráticu y clientelista de nomamientos anuláu por cuatro sentencies consecutives del Tribunal Superior de Xusticia d'Asturies".
  
Sería incomprensible que'l Parlamentu asturianu dexara esta reforma, que namás busca dar lluz verde a un sistema de nomamientos nel que "la fidelidá política" s'anteponga a la capacidá y que se caracteriza pol "nepotismu" y la "corrupción". Bloque por Asturies considera que'l proyectu ye "inconstitucional" y que la so única finalidá ye refugar les sentencies citaes. "El Principáu ta creando inseguridá xurídica, xenerando una situación de caos na función pública asturiana", comentó.

El diputáu del PP, Ramón García Cañal, defendió la so enmienda de totalidá señalando que'l proyectu nun tien llexitimidá, ye arbitrariu y contrariu a los principios del Estatutu Básicu del Emplegáu Públicu (EBEP). "Pretende siguir cola política de desprofesionalización de los emplegaos públicos siguida nestos años y reiteradamente refugada polos tribunales", comentó.

Amás, añadió que nun cuenta col apoyu de los representantes de los trabayadores y que demuestra la "incapacidá" del Gobiernu p'acometer la regulación xeneral que precisa la función pública nel Principáu d'Asturies. García Cañal alvirtió que'l proyectu establez una enumberación de puestos que van ser de llibre designación, "condicionando a futuros gobiernos la organización de la estructura de la so alministración".
  
Consideró amás que ye "inconstitucional" porque "taraza los principios de méritu y capacidá que tienen que presidir non sólo'l primer accesu a l'Alministración Pública, sinón les actuaciones a lo llargo de la carrera profesional de tolos emplegaos públicos". A lo último, considera que'l proyectu presentóse "a la trágala" y sin l'apoyu de nengún sindicatu representante de los trabayadores.

Apoyu ente PP y BA
La votación d’esta Llei foi la primer vez que’l Partíu Popular votó a favor d’una enmienda presentada pol Bloque por Asturies. D’esti mou, el resultáu foi de 22 votos a favor y 21 en contra pa con una llei tamién refugada por tolos sindicatos d’Asturies.

“Paez que se recuperó el sentíu democráticu”, señaló’l portavoz del Bloque por Asturies, Rafael Palacios, a ASTURIES.COM en rellación a que’l PP votara per primer vez a favor d’una enmienda de BA.

Nesti sen, valoró que les decisiones hai que tomales “en función de lo que tean representando”, por eso la formación asturianista apoyó tamién la enmienda de los ‘populares’. “Nun pactamos, pero podemos apoyar puntos nos que coincidamos”, aclaró Palacios sobre’l tema.

“Estabilidá” pa PSOE
Sicasí, la conseyera d'Alministraciones Públiques y Vocera del Gobiernu, Ana Rosa Migoya, refugó los argumentos de la oposición y defendió la necesidá del cambiu parcial porque va permitir adaptase a los nuevos criterios establecíos pol Estatutu Básicu del Emplegáu Públicu, amás de dotar d'una mayor "estabilidá" y "seguridá xurídica" a los procesos de provisión de puestos de trabayu que, dende 1985 y igual que toles alministraciones públiques españoles, utilizó l'Alministración del Principáu d'Asturies.

Migoya esplicó que'l cambiu traduzse en "una regulación más precisa d'estos sistemes de provisión de puestos de trabayu a ocupar por funcionarios de carrera al serviciu del Principáu d'Asturies". Regúlense asina los dos procedimientos de provisión de puestos de trabayu destinaos a esos funcionarios, afitando dos sistemes: "concursu" y "llibre designación". Según Migoya, esti procedimientu "acútase pa determinaos puestos de trabayu onde se dan situaciones d'especial responsabilidá y sobre la base de criterios d'eficacia y eficiencia"
  
Ello ye que comentó que la inmensa mayoría de les comunidaes autónomes regularon esti aspeutu colos mesmos criterios que n'Asturies, en referencia a Galicia, Aragón, Baleares, Andalucía, Castiella-Lleón, Murcia, Cataluña, País Vascu, Estremadura y Valencia.
 
La diputada del PSOE, Servanda García, refugó la intención de la oposición de presentar enmiendes a la totalidá. Asina, animó a los grupos de PP y BA a que nes enmiendes parciales contribuyan a "meyorar" no posible. "Pero lo que nun entiendo ye que nun quieran dexar que'l Gobiernu faiga usu del so derechu de modificar una llei de 1985", apuntó.
  
“Sentatu” pa IU-Verdes
Mientres, la diputada d'IU Verdes Diana Camafeita defendió'l cambiu, esplicando que ye "razonable" y "sensatu" regular el sistema de llibre designación. Acusó al PP y a BA d'utilizar argumentos "peligrosos" y negó que vaya a regulase'l "dedazu por llei". Asina, señaló que les crítiques de la oposición son "bastes" y "antiproducentes".