PSOE ,PP y IX-BA-LV discrepen sobre les promeses d'inversión p'Asturies de Rodríguez Zapatero

Los tres partíos representaos na Xunta Xeneral faen valoraciones bien
estremaes de les promeses que'l presidente del gobiernu español fixo en
relación a les inversiones futures del Estáu n'Asturies. Asina,
mientres que'l portavoz del PSOE Fernando Lastra señaló que
Zapatero ta faciendo les invesiones "más audaces d'Europa",
pal PP "quedó mui claro la falta de compromisos de Zapatero colos
proyectos n'Asturies", mientres que pa IX-BA-LV les anuncies d'inversiones
son "un brindis al sol".

Acabantes de terminar les sos vacaciones nos Ozcos, la visita que'l
presidente español fixo a Asturies y les promeses d'inversiones
estatales qu'anunciare Álvarez Areces depués de la reunión
ente dambos recibíen distinta valoracion de los tres partíos
parlamentarios. Asina'l PSOE señaló que'l nuesu país
"foi la Comunidá Autónoma cola mayor inversión per
habitante d'España" y destacó qu'Asturies tuvo un volume de
licitación d'obra pública "tan importante que
reconocióse pola sociedá asturiana y poles asociaciones
económiques" añadiendo que "esto nun ye discutible
tanto pa los que dicen que ye un brindis al sol como pa los qu'intenten
minimizar o quita-y importancia". Pela so parte'l PP, en palabres d'Ovidio
Sánchez, la visita de Zapatero foi "decepcionante" yá
que "en relación al portalgu del Güerna Zapatero
comprometióse a eliminalu, ensin que lo fixere", y "la parte
oriental de l'Autovía del Cantábricu, la del tramo Unquera-Llanes
sigue igual, ensin emprincipiar". Tamién criticó que los
socialistes "quitaren" l'Autovía del Seya.

Finalmente'l diputáu d'IX-BA-LV, Aurelio Martín,
declaró que "nun queremos que'l tema del portalgu se convierta nun
culebrón pa los asturianos como lo foi l'Autovía del
Cantábricu, de la que llevamos falando 25 años y nun ta
rematada".