Proyeutu de la FADE pa formar a muyeres

El paru femeninu n´Asturies ye xunta´l xuvenil ún de los problemes endémicos del mercáu llaboral asturianu, y ye que de fechu la mayor parte de los desemplegaos del país son muyeres. Énte esti panorama la patronal asturiana entama un proyeutu empobináu a da-yos formación a 500 muyeres col oxetivu de favorerecer la so inclusión nel mercáu llaboral. El proyeutu conozse como Pimma y quier da-y formación al coleutivu más desfavorecíu nel mercáu llaboral nes materies apropiaes pa los sectores de la construcción, tresporte, reparación d´electrodomésticos, vixilancia y sector metalmecánicu, amosando la voluntá de francer muries nos sectores tradicionalmente masculinos. Estes politiques formatives de calter igualitariu nel terrén del trabayu masculinu yá s´entamaren cola patronal asturiana de la construcción al traviés del centru formativu del mesmu. La idega ye formar a cerca de 500 muyeres nunos sectores onde hai falta de mano d´obra pero la muyer nun ye a enxertase.

Les empreses Ibermática y Informática El Corte Inglés (IECESA) son les afortunaes en conseguir el millonariu contratu pa modernizar los sistemes d´información de l´Alministración Asturiana. La duración del proyeutu ye de catorce meses anque'l contratu tamién incluye´l mantenimientu de tolos sistemes informáticos de l´Alministración hasta el añu 2007. Nenguna empresa asturiana participa del perimportante contratu, colo que demuestren lo mesmo'l baxu nivel tecnolóxicu del país como'l pocu interés en contar con empreses asturianes por parte del Gobiernu d´Areces.