Protestes pol encarcelamientu de Cándido y Morala

Caravanes de coches recorrieron ayeri pela mañana la ciudá de Xixón, amás d'Uviéu y Avilés, pidiendo la llibertá pa los sindicalistes del naval, Cándido Carnero y Juan Manuel Martínez Morala, presos por orden xudicial dende la nueche del sábadu en cumplimientu de la condena que recibieren a consecuencia de los estrozos nel mobiliariu urbanu causaos nes movilizaciones del sector va más de dos años.

Los simpatizantes de los dos sindicalistes marcharon pa contra la cárcele de Villabona, faciendo una concentración de protesta que tuvo de celebrase a cientos de metros de la puerta de la cárcele al cortar el pasu la Guardia Civil a los manifestantes. Familiares de los presos y representantes del sindicatu CSI pudieron visitar a los dos sindicalistes dientro del presidiu.

El sindicatu CSI y la plataforma d'apoyua los dos sindicalistes presos preparen más acciones de protesta. CSI quier que los demás sindicatos convoquen xunto con esta central una fuelga xeneral centrada en Xixón y que podría espardese a toa Asturies. Mientres, los abogaos de los sindicalistes van presentar énte'l Tribunal Constitucional un recursu contra la sentencia de l'Audiencia Provincial d'Asturies, que ratificare la primer sentencia condenatoria.