Protesta énte’l congresu del RIDEA

Mañana miércoles 10 de mayu entama nel Auditoriu Príncipe Felipe d'Uviéu el "Congresu d'Estudios Asturianos" col que'l del Real Institutu d'Estudios Asturianos (RIDEA) celebra los sos 60 años d'esistencia. La Xunta Pola Defensa de la Llingua Asturiana tien convocada pa les 7 de la tarde una concentración énte l'Auditoriu Uviéin, en protesta pola postura de la institución, que se negó a aceptar que se lleere una ponencia n'asturianu dientro del congresu.

La organización cívica quier asina solidarizase con Yolanda Magdalena, que presentó a esti congresu una ponencia que, baxo'l títulu "La dignificación de la llingua asturiana al traviés de los servicios de normalización llingüística nos Conceyos" facía un resume de les iniciatives normalizadores de la llingua asturiana n'alministración local de va un tiempu p'acá. La organización del congresu, encabezada pola filóloga Josefina Martínez, mandó-y a la ponente que lleere la so conferencia en castellanu, dalgo a lo que se negó l'afectada. Anque dende la Conseyería de Cultura, institución de la que depende'l RIDEA, s'encamentó al Institutu d'Estudios Asturianos a almitir la ponencia n'asturianu acordies cola llei vixente. Anque dellos miembros del mesmu RIDEA como l'historiador Javier Fernández Conde o'l filólogu Xose Luis Campal condenaron l'actitú del Institutu, el RIDEA aneció na so postura contraria a la ponencia n'asturianu.