Programa asistencial pa los emigrantes n'Arxentina

Ayeri presentóse na Conseyería de Xusticia, Seguridá Pública y Rellaciones Esteriores el programa de places residenciales pa emigrantes asturianos n'Arxentina 2004 de l'Axencia Asturiana d'Emigración, que se desarrolla na Residencia Asturiana-Club Tinetense. Na presentación tuvo'l presidente del Club Tinetense Venancio Blanco, Rosana Vega, Trabayadora Social de l'Axencia Asturiana d'Emigración y Luis Miguel Fernández Romero, Director de l'Axencia .

El Club Tinetense fundóse nel 1936 en Bonos Aires por emigrantes asturianos de la parte de Tinéu. En 1983 funden la Residencia Asturiana, hogar para persones de la tercer edá, siendo la primera y hasta agora la única institución con reconocimientu d'asturianía que tien una residencia d'esta clase. Con 87 places residenciales pa persones mayores de 65 años, les más d'elles asturianes. D'eses 87 places, 22 tan acutaes p'asturianos mayores ensin ingresos y págales directamente l'Axencia Asturiana d'Emigración, que pon un total de 730.000 euros
Al añu. Esto supón un aumentu de 4 places y cerca de 200.000 euros más en rellación al añu 2003, según destacaron dende l'Axencia. Arriendes d'ello, l'añu qu'entra va facese otru aumentu de places acordies col progresivu avieyamientu de la población asturiana d'Arxentina y tamién va treslladase'l programa a otros llugares d'América de Sur per aciu de convenios con entidaes d'emigrantes


Venancio Blanco agradeció l'esfuerzu de los asturianos y de les sos instituciones pa meyorar la calidá de vida de los sos compatriotes emigrantes, mientres que'l presidente de l'Axencia Luis Miguel Fernandez Romero esplicó que los programes asistenciales son ún de los pegoyos de la política d'emigración del Principáu, sobremanera en países que, como l'Arxentina, sufren una grave crisis socioeconómica.