El 59 por cientu de los usuarios d’Asturies.com nun ve solución al problema demográficu del país

La población d’Asturies sigue menguando –8.826 habitantes menos nel 2013– al rexistrar la menor tasa de natalidá del Estáu y la mayor de mortalidá. Esta situación nun tien solución según el 59 por cientu de los llectores d’Asturies.com.

Según los datos del Instituto Nacional de Estadística (INE) del 2013 en comparanza col añu anterior, el númberu total d’asturianos que vive n’Asturies ye de 1.058.976, un descensu de 8.826 habitantes provocaos por dellos factores, ente ellos la crisis económica, que frena la llegada d’inmigrantes y aumenta’l númberu de persones obligaes a buscar un futuru fuera de les llendes del país. A ello hai que sumar qu’Asturies rexistró los peores datos del Estáu no que respeuta a la tasa de natalidá –la más baxa– y de mortalidá –la más alta–: el númberu de nacimientos descendió un 12,5 por cientu y rexistra 6,3 cada 1.000 habitantes, siendo’l de muertes de 12 por cada 1.000 persones pese a descender la so cantidá nun 3,3 por cientu.

Pese a estos datos tan esmolecedores, l’Alministración nun paez tomar midíes, lo que convida a un 59 por cientu de los llectores que participaron nel nuesu ‘Conceyu Abiertu’ a pensar qu’esta situación nun tien solución. Mentes, un 33 por cientu sí considera que se pue enderechar el problema y un 8 por cientu nun tien nidio lo que va asoceder.

Dende esti momentu yá ye posible participar nun ‘Conceyu Abiertu’ nuevu. Nesta ocasión queremos conocer la opinión sobre l’ataque militar d’Israel na franxa de Gaza, que yá suma más de mediu millar de muertos palestinos, ente ellos muyeres y neños.