Primeros alcuentros de la llingua en Carreño

El conceyu de Carreño organiza dende güei y hasta'l 21 de mayu los primeros " Alcuentros coles lletres asturianes" una iniciativa que se presenta como novedosa pol enfoque y polos acontecimientos que s'incluyen nel programa

Ello ye que los alcuentros quieren enxertar la parte urbana y la parte rural del conceyu dientro d'un programa d'actos tresversal que trate la normalización del asturianu en tol conceyu. Asina, seminarios sobre nueves tecnoloxíes, proyecciones audiovisuales n'asturianu, actividaes d'animación a la llectura cola presentación de llibros y difusión de la toponimia del conceyu son les qu'igüen estes dos selmanes de programación,qu'entamen esta tarde con un actu solemne nel Salón de Plenos del Conceyu, anque les actividaes nun van arrancar hasta'l martes, cola proyección de curtios n'asturianu que va facese nel CIR de Guimarán - El Valle a les 7 de la tarde. Nesti mesmu llugar, pero al día dempués y a les 6 de la tarde, l'escritor Manfer de la Llera va facer la presentación del so últimu llibru "Cróniques y suaños" cola compañía del filólogu Xurde Fernández, collaborador d'Alitar Asturies.

L'actu central del xueves día 13 va ser la Mesa redonda " Llingua asturiana y muyeres, el discursu de xéneru ente la tradición y el futuru " que va ser na Casa d'Alcuentros de Muyeres de Candás y na que van participar Vanessa Gutiérrez, premiu Teodoro Cuesta de poesía 2003, Taresa Lorences, premiu Fernán Coronas 1994 y Sabel de Fausta, premiu Llectures pa Rapazos 1987.

El vienres 14, a les 18:30 na Casa de Cultura de Candás, va haber una conferencia del sociólogu Francisco Llera Ramo, autor de los dos estudios sociollingüísticos d'Asturies. El sábadu 15 sigue'l programa de charres cola entitulada "Identidá nacional y llingua: Asturies nel marcu européu" a cargu de Mª del Pilar Rose-Alcorta, Profesora de Filoloxía na la Universidá de Llondres, que va poner el casuasturianu en comparanza col escocés o'l galés.

Pal martes 18 hai puesta una actividá pa neños con María del Mar Martín, collaboradora d'Asturies.com y directora de la revista infantil on-line "A la Gueta los suaños" mientres que'l miércoles Xosé Lluis García Arias va presentar la Toponimia del Conceyu de Carreño xunta los autores de la toponimia de les parroquies d'El Valle, Ambás y Candás, Montserrat Vega González y Xurde Fernández Fernández. Ello va ser nes escueles de Guimarán a les 6 de la tarde. El xueves día 20 el periodista Próspero Morán va poner en telecentru de Candás un seminariu sobre llingua y nueves tecnoloxíes, mientres qu'a les 7 y media de la tarde'l Director de la Oficina de Política llingüística Ramón d'Andrés va presentar al carreñín Luis Alberto Prieto, autor del primer diccionariu asturianu de de sinónimos, obra acabante d'espublizar pola editorial Trabe.

El piesllu a estes xornaes va ponelu la conferencia del especialista Xulio Viejo Fernández sobre Antón de Marirreguera, l'escritor del sieglu XVIII de Carreño que ye'l príncipe de les lletres asturianes. Ello va ser nel CIR de Llogrezana a les 18:00h.