Presidencia reorganízase centralizando nella competencies d’otres conseyeríes

El Conseyu de Gobiernu aprobó ayeri'l decretu d'estructura de la Presidencia del Principáu asina como la de les conseyeríes de Presidencia, Xusticia y Igualdá, d'Economía y Asuntos Europeos y d'Industria y Emplegu. La portavoz del Gobiernu, Ana Rosa Migoya, esplicó n'acabando'l Conseyu de Gobiernu como Presidencia pasa a exercer competencies qu'hasta agora dependíen de les Conseyeríes de Cultura, Comunicación Social y Turismu y de la d'Economía y Alministración Pública, amás de l'antigua conseyería de Xusticia y Rellaciones Esteriores.

Les actividaes de la Presidencia, que d'agora en palantre va ser conseyería de "Presidencia, Xusticia y Igualdá" van organizase sobre dos estayes con rangu de Vicenconseyeríes que son la estaya de Coordinación y Comunicación y la estaya Institucional y de Servicios Xenerales. De la estaya de Coordinación y Comunicación, Migoya esplicó que la so principal función va ser coordinar dellos aspectos de l'acción de Gobiernu, asina como l'actividá política d'ésti nel territoriu. D'esta área va depender una oficina, de nueva creyación, d'Evaluación y Siguimientu de Polítiques Públiques, que va facer llabores de seguimientu sobre presupuetu y execución de les polítiques gubernamentales, apoyando les estratexes de racionalización del gastu públicu.

Pela otra parte, la estaya Institucional y de Servicios Xenerales va asistir al presidente del Principáu, Vicente Álvarez Areces, n'asuntos xurídicos y alministrativos de la propia Presidencia, dirixendo les actividaes de protocolu y supervisando los anteproyectos referíos a l'actividá llexislativa y planificadora del Gobiernu. D'esta área depende'l gabinete técnicu pa l'asistencia a la Comisión pa la Coordinación de los Representantes del Principáu nes empreses públiques de titularidá estatal y les delegaciones del Principáu en Madrid y Bruseles.

Tamién va crease una viceconseyería de Seguridá, Emigración y Cooperación al Desarrollu, de la que va depender la Dirección Xeneral d'Interior, la Dirección Xeneral de Seguridá Pública, l'Axencia Asturiana de Cooperación al Desarrollu, con rangu de serviciu y l'axencia Asturiana d'Emigración, con rangu de serviciu tamién. Con esta reorganización, Presidencia, de la que yá dependía'l Conseyu de Comunidaes Asturianes, atropa toles competencies sobre la emigración asturiana.

Amás de la viceconseyería, la conseyería de Presidencia va contar con una dirección Xeneral de Xusticia, l'Institutu Asturianu de la Muyer, la Oficina de Relaciones cola Xunta Xeneral del Principáu d'Asturies, con rangu de Dirección Xeneral, y la Unidá nel Principáu d'Asturies del Cuerpu Nacional de Policía.

La Conseyería de Presidencia, Xusticia y Igualdá va exercer amás, según esplicó Migoya, la representación que correspuende a la Comunidá Autónoma nos órganos de gobiernu de les entidaes públiques '112 Asturies' y 'Bomberos del Principáu d'Asturies'.

Respecto a la estrucutura de la Conseyería d'Economía y Asuntos Europeos, la vocera del Gobiernu comentó que va contar con cinco direcciones xenerales y la Intervención Xeneral y la Secretaría Xeneral Técnica. Va caltener les Direcciones Xenerales de Finances y Facienda, y la de Presupuestos y Patrimoniu y va incorporar la Dirección Xeneral d'Economía, de nueva creyación.

Amás, dientro de la estructura de la Conseyería d'Economía y Asuntos Europes, Migoya señaló que se contempla l'Ente Públicu de Servicios Tributarios y l'Institutu Asturianu d'Estadística.

Finalmente, no que se refier a la estructura de la Conseyería d'Industria y Emplegu, la representante rexonal señaló que-y van corresponder les funiones antiguamente atribuyides a esta mesma conseyería y les xestionaes hasta agora pola Cosneyería de Xusticia, Seguridá Pública y Relaciones Esteriores, en materia de prevención de riesgos llaborales, asina como les propies del Institutu Asturianu de Prevención de Riesgos Llaborales. Esta cobseyería va estructurase en cinco órganos centrales que son la Secretaría Xeneral Técnica, la Dirección Xeneral de Trabayu, la Seguridá Llaboral y Emplegu, la Dirección Xeneral de Comerciu, Autónomos y Economía Social, la Dirección Xeneral de Minería y Enerxía y la Dirección Xeneral d'Industria.

Los órganos d'asesoramientu y apoyu d'esta alministración van ser el Conseyu Asesor de Comerciu del Principáu d'Asturies, la Comisión de Precios del Principáu d'Asturies, la Comisión Rexonal de Seguridá Minera y el Conseyu de Relaciones Llaborales y Polítiques Actives d'Emplegu.