Presentóse'l programa definitivu de l'Arribada

La organización del certame lliterariu Arribada presentó'l programa definitivu d'esta nueva edición que va facese en Xixón del 14 al 22 de setiembre. Ente los actos anunciaos rescampla la llectura de poemes n'asturianu per parte de representantes del PSOE, PP y IX-BA-LV de Xixón. Asina ta confirmada la presencia de los conceyales socialistes Justo Vilabrille,
José Manuel Sariego,
José Ramón Tuero
y Dulce Gallego, de los populares Pilar Fernández Pardo,
Manuel Pecharromán,
Dorinda García, Pablo González, Gabriel Díaz y
María Teresa Menéndez, y del diputáu d'IX-BA-LV Francisco Javier García Valledor.

L'escritor y poeta Humberto Gonzali ye'l motor d'esta iniciativa que va celebrar esti añu la so segunda edición y que pasa de siete a nueve díes col Antiguu Institutu Xovellanos de Xixón como escenariu central de les sos actividaes, onde va acutase un espaciu propiu nel que les editoriales que trabayen el llibru n'asturianu van dar a conocer les sos novedaes y nel que va haber tiempu tamién pa les actuaciones musicales. El programa completu, que yá ta zarráu oficialmente, pue consultase dende esti enllaz (pdf).