Presentóse'l plan d'Emigración 2004-2007

La Federación Internacional de Centros Asturianos celebró esta mañana una asamblea estraordinaria nel archivu d'indianos de Colombres (Ribedeva). Nella, l'Axencia Asturiana d'Emigración presentó les llinies xenerales del Plan d'Emigración 2.004-2007, proyectu cuatrienal que contempla una xuba de presupuestu a lo llargo de los sos cuatro años de desarrollu hasta facer una inversión total de cerca de 15 millones d'euros.

L'axencia Asturiana d'Emigración, que dirixe Luis Miguel Romero, fai declaración de voluntá na presentación d'esti plan que diz que pretende que les alministraciones públiques avancen na equiparación de los derechos de los ciudadanos emigrantes colos de les persones que viven nel interior, considerándolos como "protagonistes imprescindibles" na construcción del presente y el futuru d'Asturies.

El Plan contempla cinco llinies d'actuación y 33 llinies d'actuación con 67 acciones previstes pal conxuntu de los cuatro años de vixencia del plan. Estes llinies d'actuación estrémense en Programes de promoción d'Asturies nel exterior, programes d'ayudes a los Centros Asturianos y Cases d'Asturies, programes empobinaos a los descendientes y a nuevos fenómenos de movilidá xeográfica, programes de cobertura socio-sanitario pa emigrantes residentes nel esterior y promoción social de los emigrantes retornaos a Asturies.

Esta última ye precisamente la estaya onde se pon más presupuestu y tamién una de les que más xube'l presupuestu a lo llargo de los 4 años de duración del plan, con una previsión de gastu nel 2007 1.763.812 euros contra los 1.143.000 d'anguaño, anque la mayor xuba proporcional ye pa la nueva llinia d'actuación que pretende crear una cooperación colos centros pa que collaboren na promoción d'Asturies nel esterior. Nesti sentíu, d'una partida de 126.450 euros pásase a triplicar esa cantidá pa invertir nel 2007 383.000 euros. Nesta área de promoción d'Asturies nel esterior l'Axencia Asturiana d'Emigración declara que se trata d'asitiar en mercáu l'Asturies turística pero tamién d'esparder la difusión de la cultura asturiana nel esterior.

Nesti sentíu, y recoyendo les conclusiones del pasáu Congresu d'Asturianía, el Plan cuenta cola collaboración de les instituciones más importantes na recuperación de la llingua asturiana. La cultura asturiana tiren un pesu específicu nel programa y ello conozse en que, por exemplu, nel separtáu de cooperación coles cases y centros asturianos, el Plan tamién afita la celebración d'una segunda Escuela d'Asturianía y una importante dotación de fondos bibliográficos. Sicasí, la prioridá del gastu nel Plan, como n un pue ser d'otra manera, ye l'asistencial.

Per otra parte, los programes d'ayuda a centros asturianos tienen prevista una aportación estable alredor de los 800.000 - 900.00 euros al añu, mientres que los programes de cobertura sanitaria espèrimenten tamién una xuba llinial de presupuestu cada añu, pasando de 708.000 euros a raspiar el millón nel 2007, cuando se cuenta con invertir 973.907 euros nesti conceptu