Preséntase'l grupu d'opinión "Algamar"

Al traviés d'un comunicáu preséntose un nuevu grupu
d'opinión baxo la denominación "Algamar". Esti foru
defínese, segun Simón Blanco, ún de los sos promotores,
como "un grupu persones de Siero y otros conceyos de la redolada que
quieren avanzar nel so compromisu con Asturies" y señala que'l so
papel "nun ye suplantar o rivalizar con organizaciones polítiques o
sociales yá esistentes". Algamar surde pola "la
necesidá d'un foru común de formación, debate y
creación de propuestes dende un puntu vista asturianu. Paecíamos
que la unidá yera posible y la unidá ta siendo posible".

En declaraciones a Asturies.com Simón Blanco afitó los cuatro
pegoyos d'esti grupu nuevu como son "la reclamación de los drechos
civiles, como ye la oficialidá. La reivindicación identitaria y
cultural. La preocupacíon pol modelu de desarrollu, la llucha pol
desenvolvimientu sustentable y un urbanismu que respuenda a les necesidaes de
les persones y finalmente'l drechu del pueblu asturianu a gobernase y a decidir
cuál ye'l so destín". Pa los promotores d'esta iniciativa
dos van ser les xeres básiques, "una ye la formación y el
debate de la xente que-y preocupa'l futuru d'Asturies y quier buscar
soluciones. Delles veces hai una desconocencia tala de les idees y
reivindicaciones fundamentales que poco más que les pegatines s'usen
como patrimoniu ideolóxicu. Faen falta munchos discutinios, intercambios
d'idees y análisis". La otra ye "l'actividá social. La
formación y el debate de poco diben valir si nun somos a llegar a la
sociedá. Tenemos qu'esparder les nueses reivindicaciones; trabayar col
movimientu asociativu y cola xente, presentar propuestes y mociones... Ensin
sectarismos y ensin consideramos la vanguardia que tien la verdá
absoluta que va salvar a Asturies".