Presentación n'Uviéu de la Guía de los Árboles d'Asturies

El local social de la Xunta Pola Defensa de la Llingua "La Casa Posafuelles" va acoyer esti martes 27 de febreru la presentación de la "Guía de los árboles d'Asturies" obra asoleyada pola Editorial Trabe y de la que son autores Bertu Ordiales y Guillermo César Ruiz. L'actu va facese a les 21:00h nel local de la Cai La Cuesta La Vega d'Uviéu.

El divulgador de la naturaleza asturiana Bertu Ordiales y Guillermo César Ruiz presenten una guía que ye la más completa publicada hasta agora recoyendo 95 especies d'árboles que se puen atopar pelos montes asturianos, con información detallao de cada planta, tanto no tocante a la botánica como a aspectos culturales o lliingüísticos. Asoleyada pola editorial Trabe, la guia ofrez el nome científicu, la familia a la que pertenez, la denominación n'asturianu y gallego - asturianu más comunes de cada árbol y tamién otros sinónimos, amás del nome en castellanu, portugués, francés, alemán y inglés.

La información técnica complétase cola esplicación del so étimu científicu, la descripción de les sos característiques y del hábitat onde medra, los sos usos tradicionales y aplicaciones, la toponimia asturiana rellacionada col so nome y, nun apéndiz, otros datos d'interés, como les posibles variedaes del frutu. Indícase, igualmente, si se trata d'una especie melicinal o comestible, si ta protexida o si ye tóxica.