La presentación de ‘El Batallón Galicia’ de Ruitiña enllena d’espectación l’occidente d’Asturies

|

Ciudadanos de Grandas y de conceyos cercanos enllenaron la Casa de Cultura nel actu de presentación de ‘El Batallón Galicia’, la primer novela de Cristóbal Ruitiña. Xosé Miguel Suárez Fernández ‘Tapia’ emponderó’l trabayu del periodista y la so habilidá pa entemecer realidá y ficción.

‘El Batallón Galicia’ ye una obra en gallego-asturiano na llinia de la non ficción qu'avanza ente la memoria personal y la historia coleutiva. El protagonista descubre que’l so güelu, un llabrador, perteneciera a esta compañía formada por antifascistes gallegos que mientres la Guerra Civil fuxeren a Asturies per Grandas y principa a investigar sobre la figura del so familiar y la del comandante José Moreno, desendolcándose asina la historia. Según esplicó Ruitiña nel actu, él sintiera el cantar del comandante Moreno, popular pela zona, per primer vegada na década de los 90, y más tarde enteraríase de que’l so güelu formara parte del Batallón Galicia, lo que fixo que-y surdieren les entrugues siguientes: “¿Puido conecer el meu abolo al comandante Moreno? ¿Chegaran a tratarse? ¿El feito de qu’el meu abolo tuvera nese batallón tuvo algo que ver pa qu’acabaran vindo por Grandas?”.

Estes  cuestiones son, poro, el motor de la historia de la novela, que tuvo un procesu llargu d’ellaboración y provocó nel autor delles dificultaes que salvó gracies al so fuerte venceyu sentimental colos escenarios nes que se desendolca la narración. “Hasta hai ben pouco nun sabía qu’os carreiros qu’eu anduvera por detrás de Penafonte cuando neno tamén os anduvera el comandante Moreno muitos anos atrás. E un día, cuando inda nun sabía se iba ser quén a rematar a novela decidín volver a andalos, piséin a mesma terra que pisara José Moreno Torres, vín lo que probablemente vira él cuando escapaba da morte, respiréin un aire mui parecido pro sin a urxencia de saber que podía ser el último; e decidín que sí, que tía que terminar a novela, anque nun fora máis que pa qu’os futuros caminantes de todos esos carreiros souperan que por aí tamén anduvera un home chamado José Moreno Torres al que todos chamaban comandante Moreno”.

Un final “mui suxerente”

L’actu de presentación d’esti llibru editáu por Impronta contó tamién cola presencia de Eduvigis Valledor, direutora del Colexu Públicu d’Educación Básica El Salvador, que s’encargó de la presentación del eventu, y del escritor Suárez Fernández, que contestualizó l'aparición de la novela nel procesu de remanecer lliterario del gallego-asturiano. “Chama el atención pra ben el feito de que ‘El  Batallón Galicia’ ten úa estructura mui trabayada. Hai úa primeira parte que se desenvolve nel presente, con un protagonista, Jaime Souto, que volve a Grandas y atópase cuas escavacióis que tán fendo nel Garabocho pra identificar os restos del comandante Moreno y os sous homes. É un arranque que ten suspense, que ta escrito con habilidá, y unde se nos apuntan dalgús dos temas sobre os que se vai volver al largo del obra”. Tapia tamién emponderó l’arte de Ruitiña pa mecer realidá y ficción: “Por poñeryes un caso que me chocóu, a Jaime Souto, el protagonista, pídenye úa colaboración pral libro das festas de Grandas y cópianosla na novela, con notas a pé de páxina y todo. Nunca sabemos ben únde acaba a realidá y únde empeza a ficción, y ese xogo é importante pral interés del lector”.

Por último, llamó l'atención de los asistentes, ente los qu’había vecinos d’Ibias, Ayande, Negueira o Fonsagrada, sobre el final de la novela que “tamén me pinta mui al xeito porque, anque sabemos cómo acaba a traxedia, deixa úa porta aberta mui poética y mui suxerente”.

Na semeya, un momentu de la intervención de Suárez Fernández 'Tapia' énte un sala ensin asientos llibres, con Ruitiña y Valledor a la so izquierda.

Contador Estadistiques