Presentóse'l DVD que recueye los venti años de "Dixebra"

Los miembros del grupu avilesín de rock "Dixebra" acompañaos del productor
musical Sergio Rodríguez, y el realizador Guillermo Fernández presentaron esti vienres na sede de la SGAE d'Uviéu el DVD "Dixebra n'acción" que recueye n'imáxenes el conciertu que la banda diera' pasáu mes de xunu na Plaza'l Parche d'Avilés pa celebrar los primeros venti años.


El DVD quier espeyar venti años de trayectoria en venti cantares que recuerren tola discografía del grupu, con temes de tolos sos discos. Cantares como "Asturalia", "Indios", "Pallabres Vieyes", "Grieska", "Mañana Fría" o l'inevitable himnu de la so primer etapa "Rapaza Nacionaliega", hasta los más nuevos, casu de "Ensin Novedá", "Día del Ciclón" o "Vieyu Combatiente". Naquel conciertu collaboraron xunto col grupu un bon garapiellu de músicos asturianos, ente ellos Toño Gómez nel trombón, Dj Stylo colos samplers y programaciones, el raperu Mario Fueyo a los teclaos y la voz de Xosé Ambás.

Toos estos ingredientes mécense nun trabayu visual del que'l mesmu Xune Elipe, cantante del grupu y responsable de la casa de discos "L'aguañaz" diz tar mui contentu, llamando especialmente l'atención sobre la llimpieza del soníu, agradeciéndo-yos públicamente'l cantante a los productores Kaki Arkarazo y Sergio Rodríguez el so bon facer sobre un material difícil de grabar. La calidá del conxuntu llevó a Xune a afirmar con arguyu que "Productos como esti nun salen tolos díes". Ello ye que na parte visual, la banda contó naquel conciertu con un aparatu técnicu que nun se suel ver nesti tipu de grabaciones. Hasta media docena de cámarez rexistraron los movimientos y l'actuación de Dixebra, sorrayando'l realizador Guillermo Fernández como'l ritmu de la música foi la prioridá pola que se mandaron pa facer el montaxe.

Amás de la hora y media llarga de música, el DVD complétase, amás, con una montonera d'extres qu'acerquen a la hestoria del grupu: documentales, grabaciones en directo o videoclips que faen d'est trabayu un auténticu documental de la biografía del grupu pioneru del rock n'asturianu.