Presentóse a la ciudadanía Somos Asturies, proyeutu organizativu pa llevar la marca Podemos a les eleiciones municipales

Somos Asturies dio esti miércoles el primer pasu hacia la so consolidación, dada la respuesta atopada ente los representantes de distintos círculos de Podemos qu’intervinieron nel actu de presentación celebráu n’Uviéu. Trátase d’un proyeutu organizativu al traviés de la fórmula d’agrupaciones d’eleutores que busca llevar l’espíritu de la organización a les municipales.

Xosé Xuacu Rodríguez Morón encargóse de dar les primeres pincelaes de Somos Asturies a les más de 200 persones qu’acudieren ayeri al IES Aramu a conocer de primer mano esta iniciativa de sellu asturianu. El miembru del Conseyu Ciudadanu de Podemos esplicó que Somos Asturies ye “un proyeutu políticu organizativu qu’está en fase interna” que naz con con tres idees básiques: siguir puxando y trabayando pola horizontalidá, recuperar idees que quedaron atrás nel procesu de formación de Podemos y “dar respuesta a qué vamos facer nes municipales”. Esta respuesta ye una marca común en toda Asturies (Somos Asturies) que s’organice como agrupaciones d’eleutores y que conserve l’ADN de Podemos: asamblees abiertes, firma del códigu éticu de la organización aprobáu hai poco en Madrid y métodu de primaries abiertes cola correición única de xéneru.

La idea, según esplicaron ayeri representantes de Somos Asturies a Asturies.com, ye llevar l’espíritu de Podemos a les eleiciones municipales –nes nacionales ta previsto acudir como Podemos– baxo un paragües nel que puedan entrar non sólo xente d’esa organización, sinón cualquier ciudadanu que respete los trés puntos mínimos enantes citaos. D’ehí la fórmula escoyida d’organizase como agrupación d’eleutores, propuesta qu’agora deberá ser refrendada polos simpatizantes de Podemos el mes próximu. De momento, Somos Asturies cuenta con presencia en 25 conceyos –ente ellos los más importantes en población– y col sofitu de Compromisu por Asturies –organización qu’apoya’l procesu de Podemos dende los sos primeros pasos nel país– y de munchos círculos, polo que se pudo ver ayeri nes intervenciones posteriores al actu de presentación.

Decenes de persones tres el proyeutu

Tres la intervención de Rodríguez Morón, los representantes de los diferentes equipos de trabayu –redes sociales, prensa, diseñu, argumentariu, financiación, ellaboración del programa collaborativu, asesoramientu llegal y estensión– esplicaron los detalles del so llabor, pa depués dar pasu a Emilió León, Lucía Montejo y Daniel Ripa. León faló de la necesidá de “mirar a Asturies d’una forma distinta”, mentes que Montejo llamó a “tresformar una sociedá y les instituciones al traviés de los municipios”, pa lo qu’apuntó necesario un proyeutu como Somos Asturies “que posibilite a los conceyos entrar nes instituciones”. Pela so parte, Ripa señaló que “tamos muncha xente nesto” y que se pue “recuperar l’Asturies que queremos y que tien que ser”.