Preséntase la obra ganadora del VII Premiu Fierro Botas

Trátase de 'Curandeiros, compostores y outros sanadores', de Martín Pérez Álvarez.

El testu ganador del VII Premiu d’Ensayu y Trabayos d’Investigación Fierro Botas, escritu en gallego-asturiano, afonda na medicina tradicional tres la realización d’un importante trabayu de campu y recoyida de tradición oral. El so autor ye l'enfermeru y fisioterapeuta Pérez Álvarez, que firma como Martín de Villar. L'ensayu espublízalo Trabe.

L'actu de presentación va desendolcase mañana a les 18 hores na carpa d'Arcu Lliterariu, dientro de la programación del IV Festival Arcu Atlánticu. Xunto al autor van tar presentes Xosé Antón Fernández 'Ambás', responsable del prólogu; y la conceyala d'Educación y Cultura, Montserrat López Moro.

Esti gallardón, que yá tien convocada la so octava edición, entámase n’alcordanza del xesuita Federico González-Fierro Botas, espertu en llingua asturiana que finó n’accidente de tráficu en Rusia nel 2002, y reconoz el llabor de los investigadores asturianos na llingua del país.