Prepárase en Xixón un premiu d’ensayu n’alcordanza de Fierro Botas

L'equipu d'Izquierda Xunida-Bloque por Asturies - Los Verdes nel Ayuntamientu de Xixón ta preparando una serie de midíes n'alcordanza del desapaecíu intelectual asturianista y cura xesuita Federico González Fierro - Botas. Acordies con información qu'adelantaba esti fin de selmana'l diariu La Nueva España, el grupu que lidera'l conceyal Jesús Montes Estrada va plantear el que se-y dea una cai de la ciudá al escritor y que s'entame un premiu d'ensayu en llingua asturiana de gran relevancia que podría celebrar la so entrega de premios cada 30 de payares, coincidiendo cola fecha de nacimientu de Fierro Botas

.

Defensor del usu del asturianu na lliturxa católica, Fierro Botas foi ún de los creadores nel añu 1986 del colectivu de sacerdotes asturianistes "Manuel Fernández de Castro" que llevó alantre la traducción al asturianu de testos llitúrxicos y del Nuevu Testamentu de la Biblia. Nel añu 2002 el sacerdore perdió la vida nun accidente de circulación nel trescursu d'un de los sos viaxes a Rusia, país del que yera un gran conocedor.