Premiu pa la rede de telecentros d’Asturies

El V Congresu de Telecentros y Redes de Telecentros, que se celebra en San Sebastián, reconoció a la Rede de telecentros asturiana col premiu a la "meyor iniciativa" según informó la Conseyería d'Economía y Alministración Pública. La candidatura del Gobiernu asturianu ganó a otres diez nun congresu qu'axunta a más de trescientos técnicos y responsables de redes de telecentros de toles comunidaes autónomes.


La Rede asturiana de telecentros ígüenla 85 telecentros repartíos pelos estremaos conceyos y tien un públicu de cerca de 95.000 usuarios, el 9,5% de la población d'Asturies. La rede echó a andar nel añu 2001, col oxetivu d'universalizar l'accesu a internet y les nueves tecnoloxíes a tola población amás de formar a los asturianos nel emplegu d'estes tecnoloxíes. Pelos cursos que se lleven impartíos nos telecentros asturianos nestos cinco años pasaron yá más de 64.000 alumnos, siendo 2.300 les persones que certificaron oficialmente los sos cono conocimientos d'ofimática dende que la rede ufierta esti serviciu.