Premios del Concursu de Cómic n'asturianu de la Comarca de la Sidra

Esti vienres día 3 de febreru a les 19 hores na Casa la Cultura de Bimenes van entregase los premios del III Concursu de Cómic n'asturianu y del I Concursu de Tires Cómiques de la Comarca la Sidra qu'organiza'l Serviciu de Mocedá de la Mancomunidá Comarca de la Sidra y el Serviciu de Normalización Llingüística de la Comarca la Sidra, col patrociniu de Caxastur y la collaboración de la Conseyería de Cultura, Comunicación Social y Turismu.


L'Alcalde de Bimenes, Emilio González Aller y el Presidente de la Mancomunidá Francisco Javier Parajón van entregá-yos los diplomes a los ganadores que foron na modalídá 1, que premia al meyor autor adultu de cómic n'asturianu, la escoyida pol xuráu foi la obra "ocho valles" de José Juan González García. Nesta estaya, na que'l primer premiu tien 500 euros y diploma, el xuráu dio-yos dos accésit de 200 euros y diploma a los autores David Lafuente y Tomás González Canellada.

Na modalidá segunda, empobinada a alumnos d'enseñanza primaria y secundaria de los centros educativos de la Comarca la Sidra, la ganadora na categoría de primer y segundu ciclu de primaria foi pa Mónica Arce Costales de la Escuela Pública Maliayo de Villaviciosa, mientres que na categoría del Ciclu Terceru de Primaria'l premiu mereciólu Claudia Miravalles, d'esti mesmu centru educativu. A la fin, na categoría acutada pa estudiantes d'Enseñanza Secundaria Obligatoria'l primer premiu foi pa María Sánchez Díaz de Bimenes.

El xuráu quixo destacar l'altu grau de calidá que se vio na modalidá de Cómic, asina como la bayurosa participación de los escolinos de la Comarca na modalidá de Tires Cómiques p'autores de menos de 14 años. Nel actu tamién va inaugurase una esposición coles obres presentaes a concursu asina como la entrega d'una espublización coles obres premiaes y les finalistes.