PP y IX-BA-LV critiquen la postura de la FSA na reforma del Estatutu d'Autonomía

Lo mesmo 'l Partíu Popular como IX-BA-LV criticaron los
planteamientos
iniciales de la FSA énte la prósima reforma del Estatutu.
Asina'l diputáu del PP, Joaquín Aréstegui, calificó
de "escenografía con cierta gracia" la propuesta de la FSA y
señaló qu'en temes importantes de la reforma "como la
llingua'l PSOE entá nun dixo nada". Pela so parte'l coordinador
d'IX-BA-LV, Jesús Iglesias, afirmó que los socialistes apuesten
por una reforma "cosmética que siga considerando a Asturies una
rexón de segunda pa coincidir fácilmente col PP".

Aréstegui aseguró que tolos grupos yá anunciaren na
campaña electoral qu'agora yera'l momentu de trabayar pa emprincipiar la
reforma y destacó que "paez lóxico que sía ente los
meses de setiembre y ochobre" cuando se faiga. Señaló que'l
PSOE "quier dar la sensación de que va lliderar el procesu de
reforma y marcar los ritmos del mesmo". Pal diputáu popular
"oigo dicir que van emtamar a trabayar pero nun-yos oigo nada de los
conteníos", añadien que dicir que'l pegoyu de la reforma
será'l'informe del Conseyu Consultivu "ye una perogrullada" y
ye "como nun dicir nada". Nesti sentíu manifestó que'l
Conseyu Consultivu nun se pronuncia nes coses d'importancia como no que cinca a
lafinanciación o'l tratamientu de la llingua y sobre estos asuntos
"el PSOE entá nun dixo nada".

Pela so parte Jesús Iglesias afirmó que'l PSOE "nun quier
aprovechar toles posibilidades d'aumentu de competencies que la
Constitución permite, apuesten por una reforma del Estatutu
cosmética que siga considerando a Asturies una rexón de segunda
pa coincidir fácilmente col PP". Iglesias afirmó que
"dicir que la proximidá del procesu electoral pueda ralentizar el
procesu de reforma ye daqué negativo, porque la proximidá de les
elecciones dificultaría l'aparición pública del PP y del
PSOE coincidiendo nesti asuntu y por tanto prefieren dexar la
escenificación d'esti gran alcuerdu d'estáu pa depués de
les elecciones xenerales". Finalmente manifestó que la
coalición presentará'l so propiu testu nel que va plantear un
nivel d'autogobiernu mui superior al del PSOE y PP, "asemeyao al d'otres
autonomíes".