Polémica en Nava polos Archivos de Salamanca

El Plenu estraordinariu que va a celebrar l'Ayuntamientu de Nava incluyía ente los asuntos a tratar, una la moción redactada por Izquierda Asturiana (IAS) y presentada por Asturianistes por Nava (APN), sobre la vuelta a Asturies de les 742 caxes de documentación asturiana que tan guardaes nel Archivu de la Guerra Civil de Salamanca.

Según Arturo Redondo, ún de los conceyales asturianistes de Nava, l'alcalde navetu Claudio Escobio decidió retirar "por presiones de la FSA" l'asuntu del orde del día. Ello vien a asoceder dempués de que'l PSOE local se mostrare receptivu a la petición asturianista polo que se contaba cola aprobación de la mesma, al axuntase los votos al favor d'Asturianistes por Nava y del PSOE, mientres que se sabía que'l PP diba votar en contra.

La noticia saltaba ayeri por sorpresa, cuando l'alcalde de Nava Claudio Escobio informó personalmente al conceyal d'APN Arturo Redondo de que recibiere una comunicación oficial urxente de la FSA "encamentando" la retirada de la moción del orde del día. Mientres Arturo Redondo dio anuncia de que va lleer nel plenu una protesta pola retirada de la moción del orde del día, dende Izquierda Asturiana nun aforren en calificativos pa la decisión d'Escobio. El portavoz d'IAS, Ignaciu Llope declaró que "el supuestu talante del PSOE, que permite que Zapatero almita incluso la discusión en Parlamentu d'una propuesta que considera inconstitucional como'l Plan Ibarretxe, nun llegare a Asturies, onde se roba la posibilidá de qu'un grupu con representación pueda defender y argumentar democráticamente una propuesta que'l PSOE defende n'otres comunidaes autónomes". Llope acusó al PSOE asturianu de sufrir "complexu d'inferioridá" y de tener "fobia a cualquier debate de tipu identitariu"