Polémica n’Extremadura pola propuesta del BNG de defender el “gallegu exterior”

Dempués de les últimes declaraciones del diputáu del Bloque Nacionalista Galllegu Bieito Lobeira nes que pidía una mayor promoción del gallegu que'l BNG defende que se fala nos territorios asturianos del Navia Eo, y en delles partes de Zamora, Lleón y Extremadura, la Junta d'Extremadura reacciónó con un comunicáu en qu'asegura que la propuesta del BNG dio-yos un "ataque de risa"

El comunicáu de la Junta d'Extremadura asegura que "repuestos del consiguiente ataque de risa" la Junta d'Extremadura refuga "les premises fantasioses nes que se tien el deliriu imperialista de los nacionalistes gallegos" y asegura que llamenta qu'un partíu con responsabilidaes de gobiernu "pierda'l so valiosu tiempu en fantochaes tan ridícules como ésta" al empar que s'enfota en que la Xunta de Galicia nun-yos faiga casu a los "torpes cantos de serena d'estos aprendices de bruxu colos que-yos toca gobernar". El gobiernu extremeñu asegura que nos pueblos de Erjas, Valverde del Fresno y San Martín de Trebejo nun se fala gallegu y que, en cuenta d'ello lo qu'hai ye "un dialectu deriváu del tueru común del galaicu portugués, con amestadures asturlleoneses" afitando que defender que n'extremadura se fale gallegu "ye tanto como dicir que se fala rumanu en Francia por causa del aniciu románicu de los dos idiomes". La Junta d'Extremadura afirma que lleva alantre les polítiques precises d'espardimientu de "la fala" que ta declarada como "Bien d'Interés Cultural inmaterial" "ensin falta d'abogaos foriatos".

La durísima rempuesta de la Junta d'Extremadura llevó al Presidente de Galicia, el socialista Emilio Pérez Touriño, a calificar de "descomanada" la rempuesta extremeña, dalgo a lo que la Junta d'Extremadura retrucó afirmando que la polémica ye esclusivamente col BNG y non col Gobiernu gallegu.