Podemos Xixón cifra en 47 euros el costu de los toros por familia

47 euros al añu pa caltener los espectáculos taurinos nel Estáu. Ésa ye la cantidá que cada unidá familiar destina al mundu taurinu al traviés d'impuestos según cifres de Podemos Xixón.

"Hasta 700 millones en subvenciones, según estudios estudios diferentes, algamen les partíes destinaes a la ganadería brava, les sos deveses, la comercialización de la so carne, la realización y promoción de festexos, les retresmisiones televisives, el caltenimientu de les places de toros municipales, les escueles de tauromaquia, los museos taurinos y un largo etcétera. Les cifres más conservadores sitúen estas subvenciones en 560 millones, que dividíos ente12 millones de families significa que cada familia española aporta 47 euros añales a la tauromaquia", apunten dende la organización con motivu de la celebración na ciudá de la Feria de Begoña "mientres la Sanidad, la Educación y les ayudes sociales sufren recortes constantes".

Ayeri, alredor d'un millar de persones convocaes por Anadel manifestóse frente a la plaza de toros d'El Bibio contra esti eventu y los espectáculos taurinos.