Podemos Asturies refuga repartir les alcaldíes d’Uviéu y Xixón col PSOE

|

Emilio Léon afirmó que Podemos refuga'l cambiu de cromos propuestu pol PSOE pol que los socialistes quedaríense con Xixón y Ana Taboada sería l’alcaldesa d’Uviéu. La formación va llevar a consulta ciudadana’l so posicionamientu énte la investidura a la presidencia d’Asturies. Mentes, en Llangréu l’asamblea de Somos Llangréu decide abrir negociaciones con IX.

La posición de Podemos con respeuto a los posibles alcuerdos ye nidia: nun habrá cambiu de cromos y les candidatures de xunidá popular son autónomes pa tomar les sos decisiones. Asina refuga la propuesta del PSOE d’un pautu pol qu’Ana Taboada (Somos Oviedo) recibiría l’alcaldía d’Uviéu y José María Pérez (PSOE) la de Xixón, echando d’esta forma a Agustín Iglesias Caunedo (PP) y Carmen Moriyón (Foro), de manera respeutiva, de los gobiernos municipales. León criticó a los socialistes por pensar namái en “repartise los sillones” y confirmó que nun va entrar nun Gobiernu de Javier Fernández nin a llegar a un alcuerdu de llexislatura cola FSA-PSOE. Tamién apuntó que la posición de Podemos na investidura va decidila los ciudanos al traviés d’una consulta, ensin descartar presentase como candidatu a la presidencia del país si asina lo deciden los simpatizantes de la so formación.

A nivel llocal, en Llangréu, Somos Llangréu aprobó n’asamblea entamar negociaciones con IX pa quitar del gobiernu municipal al PSOE. La candidatura de xunidá popular avalada por Podemos va poner una serie d’esixencies a la coalición que marcarán si finalmente sofita a la formación de Jesús Sánchez. Nes eleiciones a conceyu, el PSOE y IX empataron con 6 conceyales, tres la perda de 1 por parte de los socialistes y la ganancia de 2 pola coalición con respeuto al 2011. Somos Llangréu, mentes, cuenta con 5, teniendo tamién representación PP (3) y Ciudadanos (1).

Contador Estadistiques