Pieslles .com

Dende´l entamu d´esti añu tamos asistiendo a una riestra de pieslles d´empreses d´Internet nel Estáu Español. Aquelles empreses que trunfaron nos tiempos de la burbuya d´Internet pañando millones d´euros ente´l capital riesgu y dellos inversores individuales tan desapaeciendo de la rede. El casu más de recién ye´l del portal RACE.net, que dio anuncia hai unos pocos díis del fin de la so aventura na rede. El portal de venta de coches del Club tien bien de perdes y ya vienen de lloñe les series duldes sobre la viabilidá del proyeutu por parte de los accionistes del portal. Les perdes tan penriba los 9 millones d´euros, y nos prósimos díis a los venti trabayadores de la empresa van despedilos. Pero esti pieslle, como munchos otros vien con polémica. Los socios de referencia de RACE.net, Caja Madrid y la sociedá de capital riesgu británica 3i, van denunciar a los xestores del portal poos malos resultaos económicos de la empresa. El Club Automovilísticu va vese nos tribunales colos sos yá ex-socios acusáu de ser el responsable del fracasu del proyeutu. RACE participaba na empresa col 38,5% del capital.



Pero hai otros fracasos puntu com qu´españaron esti añu. El mes pasáu dábase anuncia (y denuncia) del pieslle del portal vascu d´ociu Guay.com. Col oxetivu d´evitar la quiebra de la empresa los socios de Guay.com decidieron desmantelar el portal, enfadando a los internautes que vieron como les sos cuentes de corréu desapaecíen ensin avisar. Ello ye que les perdes e tan penriba los 10 millones d´euros a repartir ente los accionistes principales: Banco Guipuzcoano y Tubos Reunidos. De fechu, yá llevaben tiempu tres d'un nuevu inversor que punxere perres para caltener el proyeutu. Esti pieslle tampoco queda ensin polémica, y ye que los socios de referencia ya ficieren les provisiones financieres nos sos balances contando va tiempu col pieslle y nun queríen que'ello dañase la so cotización na Bolsa de Madrid. Per otru lláu hai demandes xudiciales cruzaes ente xestores y socios por operaciones estraes de duldes feches polos propios directivos y onde se mezclen intereses privaos.



Otramiente, los portales Fútvol.com y Basquetv.com, perconocios poles sos ablucantes campañes de marketing, tamién dieron anuncia de pieslle'l mes pasáu. La propietaria de los portales ye la productora catalana MediaPark, empresa baxo sospecha en Cataluña pol tratu que recibe de la Generalitat asina como poles posibles conexones col dalgún casu de fraude financieru. Según MediaPark, el pieslle de los portales deportivos vien pol fin de los contratos ente la productora y les federaciones deportives de fútbol y baloncestu. La inversión fecha nestes puntu com ta penriba los 12 millones d´euros, siendo ablucante que con tantos recursos financieros y económicos nun garrare'l puxu que si llograron otros portales de deportes con munches menos perres.



El pinchazu de delles puntu com esti añu tamién afecta al portal d´empléu de Terra: Direcciona.es. Esti portal dio anuncia a los sos usuarios del fin de les actividaes ensin más esplicaciones. Tamién tan en crisis el bancu na rede Inversis d´onde el fundador Banco Zaragozano abandonó hai poco el accionariáu. Pero non solo son perdes y fracasos na rede. El sector de viaxes ta medrando a esgaya. Les empreses de viaxes na rede del Estáu Español tan en beneficios y en continuu crecimientu. Como exemplu del trunfu de dalgunes compañíes del Estáu son eDreams.com, Viajar.com, ViajarBajoPrecio.com, ViajesWeb.com, MuchoViaje.com, Rumbo.es o MundoViaje.com. Tamién los servicios de consultoría d´Internet y servicios informáticos rellacionaos cola rede furrulen perbien. Un exemplu de facer bien el trabayu n´Internet ye´l Grupu Intercom propietariu de sitios d´ésitu como Infojobs.net o Softonic.com.