Piden que nun puedan aprovechase los montes quemaos

La Coordinadora ecoloxista d´Asturies pidió-y la otra selmana al Gobiernu asturianu la convocatoria d'una reunión del Conseyu del Fueu, qu'entovía nun aconceyó dende qu'entamó la llexislatura. Al paecer de los ecoloxistes, la llucha contra'l fueu centrose namás na estinción, estaya na que reconocen que se tien avanzao muncho gracies a la meyora de medios humanos y técnicos, pero entienden que ye preciso meyorar la prevención, sobremanera cuando les más de les quemes son provocaes. Ye por ello que los ecoloxistes quieren dir a la xunta del Conseyu con un documentu en qu'espliquen como tendría de trabayase nesta xera.

Ente les sos propuestes los ecoloxistes incluyen la ellaboración de planes d'estudiu por parte de Bomberos d'Asturies sobre les causes del fueu y facer planes d'ordenación de los montes que se manden por criterios de prevención del fueu, anque ensin dulda les propuestes de más caláu son les que piden que la llucha contra'l fueu quede dafechu al cargu del serviciu públicu Bomberos d'Asturies y, sobremanera, la que pide enxertar una reforma na llei de montes con vistes a que se prohiba l'usu y aprovechamientu de les zones quemaes, siempre que pueda demostrase que se quemaron a costafecha y buscando sacar porgüeyu d'ello.