Piden más control nes gasolineres

La Coordinadora Ecoloxista d'Asturies pidió-y formalmente a la Conseyeria d'Industria d'Asturies qu'estudie la necesidá de menguar los fuertes impactos que supón la presencia d'estaciones de serviciu y surtidores de combustibles en zona urbana, instalaciones que suelten al aire cantidaes importantes de vapores de bencenu y otros hidrocarburos.

Según la Coordinadora, estes instalaciones tienen claramente efectos contaminantes, ente lo que rescampla la lliberación al aire en forma de vapor de compuestos orgánicos volátiles (COVs) qu'afecten directamente a la salú como ye'l casu del bencenu. Los ecoloxistes aporten datos y asina nel casu concretu del bencenu, la llexislación comunitario reconoz que ye axente causante de cáncanu sin nin siquiera apautar un mínimu tolerable d'esposición al mesmu. Ente los estudios más de recién sobre l'efectu de los hidrocarburos, la Coordinadora fala d'ún acabante d'espublizar na revista Science qu'esplica como los trabayadores espuestos a una concentración mínima de bencenu (1 parte por millón) teníen tases de glóbulos blancos baxes enforma. Otra investigación fecha en Francia pa la Occupational and Environmental Medicine en payares del 2004 diz que vivir cerca de talleres de reparación de coches o de gasolineres multiplica por cuatro'l riesgu de leucemia en neños por culpa precisamente de les emisiones de bencenu.

Contra estes realidaes qu'amuesen los estudios, la Coordinadora diz qu'en delles comunidaes autónomes yá tan enxertándose nos surtidores de gasolina mecanismos pa la recuperación de vapores. Según el colectivu, ello traduzse nun aforru económicu, beneficios directos pa la salú de les persones y ye amás una midida de llucha contra'l cambéu climáticu polos efectos que tien el vapor de bencenu sobre l'ozonu troposfericu. Xunta ello, la Coordinadora pide que nun se permita la instalación de más surtidores en centros urbanos y que se dean facilidaes pa desaniciar del centru de les ciudaes les que yá esisten.