Piden el 1% cultural pa Carreño

Gracies a la Llei de Patrimoniu del Principáu, tolos conceyos puen solicita-y al Principáu que'l 1% del importe de les obres públiques de más de 300.500 euros vaya pa pagar obres de meyora y conservación del patrimoniu cultural. Nel casu del conceyu de Carreño, el Principáu ta faciendo ellí estos años obres como l'ampliación del puertu o la variante de Candás, estrenada de recién como parte de la carretera nueva ente Xixón y Lluanco. Teniendo de referencia solo estes dos obres, que se presupuestaron respectivamente en 9 y 6 millones d'euros, esti 1% cultural podría suponer hasta 1 millon y mediu d'euros pa financiar restauraciones y actuaciones en materia de patrimoniu históricu y otres actuaciones de calter cultural. Conociendo esto, l'agrupación local del partíu Andecha Astur pidió-y al Ayuntamientu de Carreño que-y presentare al Principáu proyectos con cargu a esti 1% cultural. Andecha apuntó yá daquella delles intervenciones posibles, como'l Palaciu y Xardinos de los Bernaldo de Quirós en Carrió, los torruxones de Prendes y Yavio o el palaciu de los Carreño Miranda en Prendes. Al paecer de l'agrupación nacionalista, la obra del puertu bien podía xustificar aportaciones pal Muséu de la Pesca o pa caltener lo que va quedar del muelle antiguu en faciéndose'l nuevu. Carreño ye conceyu con un catálogu bayurosu d'edificios históricos, y la llista podría ser enforma más llarga. Dende'l caseríu marineru de Candás a la fábrica de Conserves d'Ortiz lo que sobren son casos posibles, pero según dicen dende Andecha, l'Ayuntamientu sigue ensin facer casu de la propuesta que-y presentaren va yá pa un añu. Andecha Astur de Carreño diz que llamenta que tean perdiéndose unes inversiones que-y abulten pernecesaries pa un Patrimoniu Históricu-Cultural amenazáu de pelligru d’estinción. La mayor actuación hasta agora a cuenta del 1% cultural del Principáu foi con motivu de la inauguración del primer tramu de l'Autovía Minera, cuando s'anunció que diba facese una partida con cargu a esi tantu por cientu pa facer intervenciones artístiques na rodiada de la pista y poner escultures que la enguapecieren. Primero d'esto, l'otru 1% cultural, el que pon el Ministeriu de Fomentu, yá financiare delles obres en Piloña, Uviéu y otros conceyos como Llanes, que solicitó'l 1% cultural a cuenta de les obres de l'Autovía del Cantábricu.