Periodistes pol asturianu califica a la TV autonómica de “ferramienta d’aniquilación llingüística”

El colectivu profesional "Periodistes pol Asturianu" fizo esta selmana una primer valoración sobre l'entamu de les emisiones de la TV autonómica asturiana (TPA), llamentando l'ausencia del asturianu de les mesmes.

L'asociación afirma que "nun tien nengún xacíu que nuna comunidá con llingua propia s'inore la so esistencia nun mediu públicu que quier ser reflexu d'Asturies" en cuantes que la TPA "tapez parte de la realidá asturiana" al nun espeyar l'asturianu nes sos emisiones. El colectivu pide en consecuencia que la TPA entame a funcionar con criteriu de serviciu públicu y non amarrada "a los complexos, los prexuicios o les directrices polítiques qu'asuma l'equipu directivu" convirtiéndose "nuna ferramienta de normalización y non d'aniquilación llingüística".

Periodistes pol asturianu denuncia que l'ausencia de conteníos n'asturianu va contra la mesma llei de creación del ente públicu y contra toles recomendaciones de la ONU, el Conseyu d'Europa, l'Estatutu d'Autonomía, la Llei d'Usu y el Plan de Normalización Social del Asturianu.

Los periodistes sensibilizaos cola normalización de la llingua llamenten tamién el "tratamientu o mención" que se fixo del asturianu nestes primeres emisiones qu'aseguren que paez que correspuende a una actitú acomplexada y diglósica pa cola
llingua, cayendo nel "folclorismu" que se diz querer evitar. Ello vien a cuentu de que'l programa infantil que s'emite tenga'l títulu n'asturianu como un "elementu de cercanía"pa que dempués el conteníu del programa namás trate l'asturianu como una "realidá estrallingüística".


La denuncia de Periodistes pol Asturianu va más allá de la cuestión de la llingua y carga contra "el silenciu qu'arrodia la creación del ente públicu de comunicación" y la falta de pluralidá y diálogu que se dio nel so procesu de creación. Periodistes pol Asturianu tamién fai de menos el criteriu de programación de la canal autonómica, asegurando que namás se trata qued'una canal de programación estatal con "pingarates de casa" dalgo que se ve dende Periodistes pol Asturianucomo otra "rareza" de la TPA en comparanza con otres canales autonómiques "que parten del fechu de tener entidá y pesu informativu bastante como pa contar con una axenda propia"