Peligru nes playes del occidente

En delles playes del occidente astur tan apaeciendo exemplares d'aguamala, un pólipu altamente tóxicu en casu de contactu físicu. El CEPESMA encamienta nun allegase a elles, en cuantes que los sos tentáculos puen midir hasta 30 metros.

Si ayeri les playes del occidente amanecíen estraes d'exemplares de Velella Velela, un pólipu inofensivu que venía en grandes báramos arrastráu pol aire y pola corriente, el Centru pal Estudiu y la Protección de les Especies Marítimes (CEPESMA) da güei anuncia de l'apaición d'exemplares d'aguamala o veleru (Physalia physalis) nes playes de Pormenande y Porcía.

L'aguamala ye un pariente enforma dañible de la velella. Lo mesmo qu'esta, compónse d'un flotador y d'unos tentáculos que van somorguiaos, pero mientres los flecos de la velella son inofensivos pa los humanos, los de l'aguamala, qu'amás puen midir hasta 30 metros, tienen un velenu capaz de causar quemadures graves y, en persones sensibles, de cortar la respiración y causar problemes cardiacos. Ello ye que, según informa'l CEPESMA, ayeri pela tarde yá se rexistraron trés casos de persones que precisaron d'atención médica por contactu con estos pólipos.

Va cuatro años, delles playes del centru y oriente d'Asturies tuvieron de trancase al bañu énte la presencia d'estes criatures. En casu de contactu con una, y en notándose síntomes respiratorios, resquemor o sudamientu escesivu, encamiéntase dir al médicu.