Pedro Sánchez afronta’l Plenu d’Investidura con 179 votos apallabraos

Esti miércoles ta celebrándose nel Congresu la primer de les sesiones del Plenu d’Investidura de Pedro Sánchez, al que llega con 179 votos apallabraos que-y daríen la presidencia del Gobiernu estatal na primer votación, programada pal xueves. El so discursu, nel que defendió “en defensa de la concordia” una amnistía “perfeutamente llegal”, allargóse per cuasi dos hores.

Depués de que la Cámara Baxa refugara a lo último de setiembre la candidatura del popular Alberto Núñez Feijóo, y depués d’una llarga negociación coles dos fuercies catalanes con representación, Junts y ERC, Sánchez acudió esta mañana al Hemiciclu con 179 votos apallabraos. Son los de los citaos partíos, el grupu propiu, y los de Sumar, EH Bildu, EAJ-PNV, BNG y Coalición Canaria, que precisamente votara a favor del gallegu nel anterior Plenu.

Nel so discursu d’esta mañana, duru con Núñez Feijóo y el PP, Sánchez defendió l’aición del so gobiernu, l’alcuerdu actual con Sumar y l’amnistía de los imputaos pol ‘procés’ catalán pa reconducir la situación política en Catalunya. Aseguró que ye “perfeutamente llegal” y afaló a “llevantar un muru de democracia, convivencia y tolerancia” frente a les proclames de la derecha y la ultraderecha.

Los tiempos

Esta tarde van tomar la pallabra los diferentes grupos parllamentarios, de mayor a menor representación, a esceición del socialista, que va ser l’últimu n’intervenir. Asina, van falar, nesti orde, el PP, VOX, Sumar, ERC, Junts, EH Bildu, EAJ-PNV y el grupu mestu.

Caún va tener 30 minutos pa fixar la so posición y Sánchez nun va tener límite pa la respuesta. Llueu va haber una réplica de 10 minutos, a la que’l candidatu tamién va poder responder.

A última hora de la tarde va zarrase la primer sesión pa siguir coles intervenciones mañana pela mañana. Darréu, la presidenta del Congresu va afitar la hora de la votación, que nel casu de la investidura de Feijóo foi al rodiu de les 13 hores.

El socialista necesita mayoría absoluta (176 votos) pa salir investíu, lo que se da por seguro. Nel casu de nun consiguilos, habría una segunda votación el sábadu, na que debería contar con una mayoría simple.

Na semeya, vista de los escaños socialistes mientres la intervención de Sánchez esta mañana.