Patrimoniu da-y el preste a la cesión de la finca pal treslláu de los restos del castru de Cellagú

El Serviciu de Patrimoniu del Conceyu d'Uviéu informó favorablemente sobre l'apertura d'espediente de cesión al Principáu d'una finca de cerca de 25.000 metros cuadraos na parroquia de Llatores pa tresladar ellí los restos del castru de Cellagú, que va desmontase del so llugar orixinal pa permitir l'avance de la cantera de la empresa de cementos Readymix-Asland qu'atiesta col yacimientu. El conceyu pon como condición que la faza acutada pa los restos del castru ha ocupase d'equí en cinco años y que l'alministración autonómica ha iguar el camín que lleva hasta'l prau. La cesión va tar espuesta a información pública pol plazu de quince díes.

Nel añu 2005, el Conseyu de Patrimoniu del Principáu d'Asturies descatalogre los restos de Cellagú, una decisión qu'incluyía la obligación de desmontar y treslladar los restos d'esti castru de la edá del fierro. Cellagú supón l'exemplu d'arquitectura castreña más importante del conceyu d'Uviéu. Con ser ún de los meyor estudiaos y documentaos, el de Cellagú ye tamién ún de los ataques al patrimoniu asturianu más llaceriosos que se conocen.

Asitiáu nun altu nel valle del Ríu Gafo, al sur del conceyu d'Uviéu, Cellagú tuvo'l so aniciu nun pobláu indíxena prerromanu hacia'l sieglu V enantes de Cristo. Como munchos otros, el castru tuvo una posterior ocupación romana qu'entamó a mediaos del sieglu I. Les primeres escavaciones que se fexeron en Cellagú nel añu 1994 descubrieron la esistencia d'un complicáu conxuntu de muries defensives anteriores a la llegada de los romanos al castru que se siguieron enanchando en tiempu d'estos cola construcción d'un preciosu turruxón reondu y una segunda muria. Aquelles ecavaciones ayudaron a rescamplar la importancia d'un castru qu'ocupaba más d'once mil metros cuadraos y asoleyaron tamién restos d'actividá metalúrxica, alcontrándose talleres de fundición y bien de preseos y adornos metálicos, amás de cacía de cerámica.

Los arqueólogos rellacionaron siempre'l castru de Cellagú con otros otros de la redolada, y ye que dende Cellagú hai contactu visual con otros poblaos de tiempu prerromanu, mientres que'l llabor sobre los metales, nel que yeren especialistes los habitantes del pobláu marca l'aniciu de les mines de fierro del Aramo. Too ello, al empar que la construcciónde villes de tipu romanu na redolada del castru convierte Cellagú nun llugar pal que los historiadores albidren que tuvo un papel clave na fundación de la ciudá d'Uviéu.

La supervivencia de Cellagú complicóse enforma a mediaos de los años 90 del pasáu sieglu. Nel 1996, la empresa de cementos Readymix Asland pidió permisu pa enanchar la esplotación minera, entamando un debate ente defensores y contrarios al castru. En medio d'esti discutiniu, una nueche de 1997 un grupu de desconocíos entraron al castru, esfarraplando con picos y maces les muries y estructures y destruyéndolu dafechu. Por primer vegada, un castru foi portada de tolos periódicos asturianos, xenerando un debate social nel que quedó pa la historia la frase del diputáu Anton Saavedra, que definió'l castru como "un montón de piedres".

El pulsu decidióse a la fin al favor de la empresa, y anque la Real Academia de la Historia ellaborare un dictamen encamentando la conservación del castru, el Principáu optó por una decisión draconiana, aprebando nel añu 2002 el treslláu de los elementos del castru a un aula didáctica na finca qu'ufiertaba'l conceyu y la ocupación del llugar pola cantera.