PAS y URAS van celebrar actu conxuntu nel Día d'Asturies

El Partíu Asturianista y la Unión Renovadora Asturiana van celebrar xuntos emn Xixón la fiesta del 8 de setiembre, día d'Asturies. La Plaza'l Marqués ye'l llugar onde, sacantes cambeos d'última hora, van facer la celebración les dos organizaciones

La formación política que lidera Xuan Xosé Sánchez Vicente y el partíu de Sergio Marqués van facer asina'l primer actu públicu conxuntu dende que dambes organizaciones dieren anuncia de qu'entamaben un camín conxuntu con vistes a presentase a les elecciones del añu 2.007. la mesma convocatoria reconoz esta intención cuando fala de que l'actu del día 8 va ser "un pasu más" nel camín p'apautar alcuerdos definitivos ente dambes fuerces polítiques

Hasta agora, los dos partíos asturianistes teníen fechos comunicaos de prensa conxuntos dientro d'una unidá d'acción que tenía por exe temáticu la reforma estatutaria, pero va ser la primer vegada que les dos formaciones faigan actu públicu conxuntu. Baxo'l lema "Día del País Asturiano" la convocatoria va tener por escenariu Xixón, onde los dos partíos van facer una concentración, lo más seguro, na Plaza'l Marqués, xunta'l Palaciu de Revillaxixéu y la estatua del Rei Pelayo, anque'l llugar entovía nun ye definitivu.

Darréu de la concentración, los dos partíos van facer una xinta pa la que yá pue acutase plaza nes sedes de les dos organizaciones, la del PAS na Cai El Carme esquina a Pedro Duro y la de la URAS na Cai Uría.

Les dos fuerces polítiques defenden el so apueste conxuntu como un camín pa ufiertar a a los asturianos una alternativa política "centrada y moderna" que defenda Asturies n'España y Europa, faciendo progresar la nuestra economía y emplegu, torgando la emigración de la mocedá, y que "ame y estime la nuestra cultura identitaria" convirtiendo "la resignación de la nuestra sociedá nuna ilusión creadora pal futuru"