PAS-URAS va ocupar l'alcaldía de Villaviciosa y fuerza l'abandonu de Cobián

Asensio Martínez Cobián, alcalde de Villaviciosa les cuatro últimes llexislatures, fexo público ayeri que refugaba’l so acta de conceyal, ello dempués de que’l so partíu pactare colos conceyales d’URAS-PAS el formar gobiernu nel conceyu col renovador Manuel Busto, antiguu collaborador de Cobián, nel puestu d’alcalde. Cobián manifestó na so despidida del conceyu qu’hebo votantes del so partíu “que nun foron lleales” a la sigla del PP y que-y ficieron dañu votando a otra formación. Cobián nun aclarió cual va ser el so futuru políticu, anque tampoco negó que-y prestaría ser senador, xustificando’l so abandonu del conceyu por nun querer ser una estorbisa pa naide. Dempués de trenta años en manes del PP, el gobiernu del conceyu queda agora al cargu de la coalición ente PAS-URAS y PP, con Manuel Busto d’alcalde. L’históricu militante asturianista Xicu Yepes, que na pasada llexislatura ficiere oposición en solitario, va tar asina ente los conceyales que van facer equipu de gobiernu.