Palacios pide’l votu de los indecisos pa “condicionar” la política del país

Bloque por Asturies-UNA-LV-GV celebró esta fin de selmana l’actu central de campaña. Rafael Palacios pidió a los indecisos el so votu pa poder “condicionar” la política frente a les dos opciones mayoritaries: Foro-PP y PSOE-IX.
 
El cabeza de llista de la coalición nacionalista y verde faló, per un lláu, “de la derecha, de Foru y PP, que yá sabemos a lo que nos lleva: l'esmantelamientu de los servicios públicos, les privatizaciones y los retayos sociales, la marcha atrás en derechos fundamentales, la falta de conciencia ecolóxica y l'abandonu de la nuesa llingua y cultura”. Mentes, pel otru, centróse na alianza posible ente’l PSOE y IX, “que como se vio l'añu pasáu, aplicaríen tamién les polítiques de retayos, impuestes y dexaes” por estes dos formaciones, “si nun tien quien s'oponga pa torgalo”. Amás, recordó que “nun van facer nada pola defensa de la nuestra identidá y mediu ambiente", y nun refugó la posibilidá de qu’UPyD se sumase al gobiernu del país nun tripartitu con estes dos organizaciones.
 
Na so intervención nel eventu, que tuvo como sede’l Centru Municipal Integráu d’El Llano, en Xixón, Palacios aseguró que, de consiguir representación na Xunta Xeneral, la coalición nun entraría nun gobiernu "pero sí condicionaría les polítiques que se fadríen dende'l triple planteamientu que defendemos: derechos llaborales y sociales, Asturies y territoriu”. “Somos, como se demostró nel pasáu, la única garantía de qu'esos planteamientos taríen presentes na política institucional", añadió. Según defendió darréu’l cabeza de llista, Bloque por Asturies-Unidá Nacionalista Asturiana-Los Verdes-Grupo Verde (Bloque-UNA-LV-GV) tratáse d’una coalición formada por trés organizaciones con “una propuesta qu'apela a toles persones que quieran que nes instituciones y na cai se defedan polítiques d'esquierdes contra los retayos; a tolos que dende planteamientos asturianistes o nacionalistes quieren una alternativa política que defenda los intereses d’Asturies y la so identidá; y a toles persones ecoloxistes que quieran ver reflexaos los sos planteamientos nuna propuesta politica”. Por esti motivu, llamó a la movilización eleutoral d'esos trés sectores en favor de la candidatura nacionalista y verde.
 
“Nun dependemos de lo que nos digan los nuesos xefes de fuera”
 
Yolanda Huergo tamién tocó la pallabra nel actu d’El Llano de Bloque-UNA-LV-GV. La númberu dos pola circunscripción central fixo una crítica a los líderes de los partíos estatales que viaxen a Asturies a pescar votos. “Veníen esta fin de selmana a ver a los sos delegaos de zona”, dixo Huergo, que recordó que Bloque-UNA-LV-GV ye una coalición que “nun dependemos de lo que nos digan los nuesos xefes de fuera d’Asturies".
 
Tamién tuvo pallabres pa Foro de Ciudadanos, un partíu “que nun fixo nada añu pola cultura y la llingua asturiana, sinón que retayó drasticamente los presupuestos dedicaos a estes partíes”, y afirmó qu’Álvarez-Cascos “yá dexó de referise a Asturies como un país y les sos úniques recetes pasen por repitir llugares comunes. Y ta claro que sí esiste un pactu pa repartise Asturies, pero ún de los sos actores ye'l mesmu señor Cascos". Darréu, Huergo criticó la política del PSOE, al que calificó de “responsable principal de la crisis estructural que sufrimos n’Asturies”, poniendo como exemplu de xestión nefasta y d'espilfarru l’ampliación d’El Musel, “el Muselón”. Por último, refirióse a Izquierda Xunida como la “muleta necesaria pa facer les polítiques que nos llevaron hasta onde tamos”.